MZP ten Bairabi Zophai hmuna Zofate Chawlhbuk sak tum Assam Police-ten dang, buaina chhuakah chanchinbumi telin mi 10 hliam

0
1601
views

MZP ten vawiina Bairabi Zophai hmuna Zofate Chawlhbuk sak an tum chu, Assam Police ten an phal loh avangin buaina a chhuak a, Assam Police ten tianga an vuakna ah Mizoram mi 10 vel an hliam a, hliam zingah hian Mizoram chanchinbumi 2 an tel.

Chawhma dar 11:30 velah Assam Police te hian chawlhbuk sak tuma pungkhawm, MZP member te hi tiangin an vua a, chanchinbumi hliam tuarte hi The Aizawl Post News Editor Zohmingmawia leh Kolasib Duhlai Editor R Lalnunmawia te an ni a, Kolasib Zingtian Editor Zomuanpuia Bike pawh vuak chhiat nual a ni a, MZP member lamah mi 7 an hliam a, Bairabi khaw mi pakhat a hliam bawk. Hliam tuarte hi Bairabi Damdawiin ah First Aid pek an nih hnuah ngaihtuahawm lutuk an awm loh avangin chhuah tir leh vek an ni.

Assam Police ten tiang an chelek hnu hian chawlhbuk sakna tur hmunah hian Assam Police-te awmin, MZP-te chu a piah deuhah an inkulh thung a. Buaina thlenna hmunah hian Mizoram lam atangin Magistrate leh police kal an awm lo a ni. MZP president L Ramdinliana Renthlei chuan Mizoram leh Assam sorkarin inremna an siam hma chuan Zophaiah hian awmchilh an tum tih a sawi a, Assam Magistrate-te’n Assam sorkarin in biak an duh thu Mizoram Chief Secretary hnenah Nilaini khan an thawn thu an hrilh tih sawiin, “Mizoram sorkar lamin engtin mah an chhang let lo a, hei hi Assam sorkar lam thinrinmna chhan pakhat pawh a ni,” a ti. Assam sorkar-in a ram chhanna atan a police-te a hman laiin, Mizoram sorkarin police pakhat a tir lo chu mak an tih thu MZP President hian a sawi bawk.

Chanchinbumite zinga Assam Police te kut tuar an awm hi Mizoram Journalist Association MJA chuan a ngai thutak hle tih MJA President Pu Vanlalrema Vantawl in a sawi a, MJA hian thutkhawm hmanhmawh a ko nghal a ni.

MJA hian Mizoram Journalist te thisen chhuak hial khawpa Assam Police ten kut an thlak leh, an bungruate an tichhia chu na takin an dem a, Journalist ten an nihna tichiangtu Identity Card (ID) an entir chung pawha engahmaha ngai lova Assam Police ten kut an thlak leh, Press sticker inbel hmu reng chunga journalist te lirthei an nghaisa chu, chanchinbumite zalenna rahbehna dik tak a nih avangin Mizoram Journalists Association (MJA) chuan thinrim thlak a tih thu an sawi a. Assam Police kut tuar Mizoram Journalist te leh an bungraw chhiate hi a tul anga zangnadawmna pe turin MJA chuan Assam sawrkar a phut bawk a, He thilthleng chungchang hi MJA chuan ngawih bopui mai a tum lo va, a enzui zel dawn a ni an ti. MJA sawi danin Journalist 3 ten Assam Police te kut an tuar a ni.

Bairabi Zophai hmuna Zofate chawlhbuk sak tum MZP kal ten Assam Police kut an tuar hi Mizoram sorkar in a tih tur a tih tawk lo vang niin MNF General Secy. Pu Lalruatkima MLA in a sawi.

Hetihlai hian Home Minister, Pu R. Lalzirliana chuan ZONET zawhna chhangin helai hmun hi Assam leh Mizoram inri-na, ramri buai lai a nih avangin Mizoram leh Assam lamin kutthlak lohna tura dah a ni tih a sawi a, heti chunga helai hmuna eng thil emaw lo tih hi a rem loh bakah hei hian ramri buai chinfel kawngah kawngro a su lova, chuvangin MZP hruaitute pawh helai hmuna Zofa Chawlhbuk sak leh an tum chu ti tawh lo turin a lo ngen tawh niin a sawi a. Bairabi VC leh tlawmngai pawlte pawhin MZP te chu helai hmunah hian engmah ti lo turin an ngen tih a sawi bawk. Telephone-a Zonet zawhna chhangin Home Minister chuan he thil hi nimin piaha Cabinet Meeting-ah pawh an sawi chhuak tih a sawi. ZONET thu dawn danin Mizoram leh Assam ramri-ah tun hmalam pawh khan buaina a awm zeuh zeuh avangin kum 2013 leh kum 2015 inkara Kolasib Bawrhsap hna chelhtu, Pu Jitender Yadav leh khatih laia Hailakandi District Bawrhsap te chuan sorkar aiawha thutlukna siamin ramri buai chinfel a nih hma chuan helai hmunah hian khawi lam lam mahin kutthlak loh ni se tiin thu an lo dah tawh a ni.