Mizoram University Student’s Council-in Vice Chancellor nghet neih phutin vawiin khan MZU-a thawkte pisa kai turte an dang leh a, ni 3 an danna a ni tawh. MZU zirlaite hian an thil phut chungchanga sorkar laipui atanga thu thar engmah a la awm loh avang leh, sorkar laipui koh eih nan vawiin khan Union Human Resources Development Minister, Pu Prakash Javadekar-a lim an hal a ni. Puan tawh angin, MZUSC-in MZU hnathawkte an dan chungchangah nimin khan MZU Registrar, Pu C. Zothankhuma chuan MZU zirtirtu leh thawktu dangte chu dan pangngaia pisa kai turin a hriattir a, he thupek zawm hian zirtirtu leh thawktu dangte chu vawiin khan pisa kai tumin an kal a, zirlaiten Gate-ah an lo dan avangin nasa vak lovin an innawr a, buaina dang chhuak lovin MZU hnathawkte hi chhun dar 12 vel khan an tin darh a ni. Puan tawh angin, MZUSC hian Nilaini atang khan Vice Chancellor nghet neih phutin MZU-a thawkte pisa kai tur hi an dang a, Vice Chancellor nghet an neih hma chuan, MZU-a thawkte hi dan chhunzawm zel an tum thu leh, an thil tih dodal tum an awm chuan na taka do let an tum thu an sawi a ni.
Mizoram State Branch National Students’ Union of India chuan, Mizoram University-in rei tak, Vice Chancellor a nei tawh lo chu tha lo an tih thu an sawi a. BJP kaihhruai sorkar laipui chu Mizoram University-a Vice Chancellor nghet dah chungchang tikhawtlai luiah puhin, Kristian tamna state, Mizorama zirna in sang ber, Mizoram University Vice Chancellor tur hi BJP kaihhruai sorkar laipuiin RSS mi leh sa a la hmu zo lo em ni tih an zawh rualin, a rang thei ang bera Vice Chancellor nghet dah turin sorkar laipui chu an phut thu, NSUI chuan an sawi.
