MZU Vice Chancellor nghet neih thuai Union Minister-in tiam

0
334
views

Mizoram tlawha lo zin, Union Minister of State for Environment, Forest & Climate Change, Dr. Mahesh Sharma-a’n Mizoram University Students’ Council hruaitute chu Vice Chancellor nghet an neih thuai theihna tura bawhzui a tiam. Vawiin khan Mizoram University zirlaite hi Raj Bhavan kawtah pawndum nena pung khawmin, Union Minister of State-in Raj Bhavan a luh dawna a hmuh turin, MZU-in Vice Chancellor nghet neih an phutna thuziak chi hrang hrang an lo ken bakah, MZU-in Vice Chancellor nghet neih kan duh tiin an lo au rual a. Hemi hnu hian Union Minister chuan MZUSC hruaitute chu amah hmuhna hun a siamsak a. MZUSC hruaitute chuan Union Minister hi Raj Bhavan-ah kawm nghalin, Vice Chancellor nghet an mamawh thu leh Vice Chancellor nghet an neih loh avanga kawng hrang hranga harsatna an tawh mekte an hrih a. Union Minister chuan an harsatna tawh chu lo bawhzui a tiam bakah, Human Resource Development Ministry leh President Office pawh vawiin ngeia biak a tum thu a sawi a, Larsap, Mizoram University Chief Rector ni bawk, Lt. Gen Nirbhay Sharma pawh MZU-in Vice Chancellor a neih loh chungchang leh thil tih zel dan tur sawipui a tum thu, MZUSC hruaitute hi a lo hrilh bawk. Puan tawh angin Mizoram University Students’ Council hian Vice Chancellor nghet neih phutin kar kal ta Nilaini atang khan Mizoram University-a zirtirtu leh thawktu dangte pisa kai tur an dang tawh a ni.