Nagaland Assembly inthlan neih tur boruak sosang, inkhawm banah campaign

0
344
views

Nagaland Assembly inthlanna neih turah pawh boruak a sang sawt hle a, hmun hrang hrangah Sunday School inkhawm banah party hrang hrang an campaign nasa hle. Puan tawh angin Nagaland-ah hian Assembly Seat 60 a awm a, tun thla ni 27 hian an inthlang dawn a, Meghalaya leh Tripura inthlannaa vote tla te nen rualin thla thar ni 3-ah khian vote chhiar a ni ang. Nagaland-ah hian tun tum inthlanah, party hrang hrangten banner an tar nasa hle a, kawng dung leh bang vela poster tar erawh hmuh tur a awm meuh lo thung. Inthlan chuh tum mi 195 zinga mi 58 chu rorel lai, NPF MLA an ni a, anni dawta candidate ngah ber chu NDPP an ni a, candidate 39 an nei a ni. Party langsar zual zingah BJP chuan candidate 20 an nei a, Congress-in candidate 18 an nei a, NPP-in candidate 25 an nei a, AAP pawhin candidate 3 an nei ve bawk. Puan tawh angin NDPP-in CM atana an zawrh, Neiphu Rio chu kar kalta khan chuhtu awm lovin a lo tling tawh a, a party leh BJP-te an thawk dun a ni. Nagaland-a inthlan campaign-ah hian pawisa sem a hluar thin bakah ruai theh-te an ching hle a, zu pawh a zalen thin hle. Hei vang hian Nagaland Baptist Church Association chuan mipuite chu thianghlim taka vote thlak tur leh hetiang thil tha lo beisei lo tur hian an zirtir nasa hle a ni.