Nakkuma Mizoram Assembly inthlanna tura candidate atana Chakma dah loh chungchangah party hrang hrangin an ngaihdan an siam fel thuai dawn. Hemi chungchang hi vawiin khan tlawmngai pawlte leh Political Party tin aiawhte thu khawmin an rel a, he thilah hian Party tinin September ni 15 aia tlai lovah an ngaihdan chiang taka siam fel vek ni se an ti a ni. He thutkhawmna pawimawh, Central YMA Committee Room-a neih hi Central YMA President, Pu Lalbiakzuala’n a kaihruai a. Citizen Amendment Bill, 2016 chungchang pawh sawihovin, he bill an duh lohna leh tha an tih loh thu, Joint Meeting on the Citizenship (Amendment) Bill, 2016 Chairman hnenah thlen ni se an ti a. He Committee hotute pawh Mizoram rawn tlawh ve tura ngen ni se, a tul angin Delhi-ah pawh aiawh intirh ni se, an ti bawk. He Joint Meeting-ah hian Central YMA, MUP, MHIP, MZP leh MSU aiawhte an tel a, Political Party, tel tura sawmna an pek zingah BJP, Mizoram State aiawh tih loh chu Party tin aiawh pathum theuh an tel bawk a ni.
