National Highway 54 kawng chhuat Hnahthial khaw chhunga meter 50 vela thuia bala thirlei dawhna tur sum Ministry of Road Transport & Highway-ah dil nawn leh a ni.

0
256
views

 

ZONET zawhna chhangin PWD hotute chuan sum dil hi cheng vbc 2, nuai 93 leh sing 9 a ni a, hei hi thirlei, galvanised bailey bridge dawhna tur hmanraw leina tur te, a phurh leh dawhna tur bakah Aizawl lam panga kawng chhuat hniam zawk tihsanna tur te huam tel tir vek a ni. Bailey Bridge feet 180 vela sei, feet 14.25 vela zauva dawhna tur sum mamawh dilna hi Additional Director General, hmarchhak bial enkawltu Pu IK Pande hnenah a thlalakte nen thawn tawh a ni a, hemi hmalam hian Ministry of Road Transport & Highway chuan ram chhunga kawng National Highway & Infrastructure Development Corporation Ltd. (NHIDCL)-a hlan tura tihfel tawh reng rengah sorkar laipuiin sum a pe thei tawh lo tih Mizoram PWD hotute lo hrilh tawh mahsela, he kawngpui hi Mizoram chhim leh hmar inkalpawhna National Highway awm chhun a ni tih sawiin, tuna Mizoram sorkar tana sum pek tawh bakah lei dawhna tur sum mamawh a hrana pe leh turin ngenna siam a ni. PWD hotute chu he estimate thawn tak hi ngawrh taka an bawhzui mek thu leh Ministry of Road Transport & Highway-in sanction thuai an beisei thu an sawi a ni. Hemi hmalam hian lei dawhna tura Mizoram sorkara sum dil chu Finance Deptt.-in pek theih a ni lo tih a lo sawi tawh a ni.