New Secretariat Complex-a Mizoram Forensic Science Laboratory hnathawh thlirletna

0
870
views

New Secretariat Complex-a Mizoram Forensic Science Laboratory-in nikum January a\anga November ni 30 thleng khan thubuai 631 a endik a, finfiahna 8,074 an zir chiang a, pawi khawihna hmun 71 endikin, Court-ah thubuai 236 a dinpui a ni. Mizoram Forensic Science Laboratory hian misual man tawhte kutze thla (fingerprint) pawh 5,595 an nei tawh a, a \ul huna hman theih turin khawlah a vawng \ha a, pawi khawihna hmun an tlawh zingah tualthahna, ruang chhar leh ruk ruk kaihhnawih a tam ber a ni.

Mizoram Forensic Science Laboratory hi kum 2000, July ni 31 khan din a ni a. National Human Rights Commission inkaihhruaina danin a phal angin kum 2015 March thla khan Direcrorate puitlingah hlan kai a ni a. Tunah hian Division 7-ah tihlen tawh a ni a, Chemistry Division, Question Documents Division, Fingerprint Division, Ballistics and Toolmarks Division, DNA Division, Photography Division leh Toxicology Division-ah \hen a ni. Pawi khawihna hmun hrang hrangah kal kualin, finfiahna awm thei angte an la khawm a, pawi khawihtute man chhuahna kawngah Police kutke \angkai ber pakhat a ni mek a ni.