New York khawpuiah tualchher bomb tihpuah a ni a, thi an awm lo a, bomb hi a tlawlh titih avangin, hliam pathum pawh an na vak lo a, bomb tipuaktu hi na takin a hliam thung a ni. Bomb hi tualchhung sanaa zing dar 7:20 khan, Manhattan biala bus station, Port Authority terminal-ah tihpuah a ni a, police-te chuan bomb tipuaktu hi Akayed Ullah, kum 27 mi, Bangladesh atanga pem lut a nih thu te, thih chilh a tum nia an hriat thu te an sawi a, US President, Donald Trump chuan he thil thleng hi a dem thu a sawi bakah, an ramin pem thar a lo dawnsawn dan chu tha lo a tih thu a sawi leh a, nupui pasal emaw, an fate emaw pawh ni lo, an chhungte dang, America rama an awm avanga pem luh leh, hna an thawh phal theihna dan chu siam that a ngai tawh hle tih a sawi leh a ni. An mi man, Akayed Ullah hian America sorkarin Islamic State pawl a beih avanga phuba lak tum niin a insawi a, tun hnaia Gaza-a Israel chet dan avang pawha a lungawi loh thu a sawi a ni. Akayed Ullah hi New York khawpui chhunga Brooklyn-a cheng a ni a, a chenna in pawh hi dap nghal a nih thu, New York Times-in a sawi a, electric company-ah tun hnaiah a thawk nia hriat a ni. Ullah hi kum 2011-ah khan family visa hmangin Bangladesh-a Chittagong atangin America ramah hian a lut a, an ramah dan bawhchhiatna thubuai a la nei ngai lo niin Bangladesh sorkar chuan a sawi.
Chanchin Thar New York khawpuiah Bangladesh miin bomb tipuak
