Nimin khan Aizawl Armed veng South leh Salem veng mi \henkhatin Sairang tlangval 3 na takin kut an thlak a, hemi chungchangah hian Sairang khawtlang an lungawi lo hle.

0
557
views

Sairang khawtlang hruaitute hnen a\anga ZONET thudawn danin, Tlawngluia Sairang naupangin lawngleng an dah \ha tur chu heng mite hian chuan an dil a, an remtih loh avangin buaina an siam a, naupangte mangang chuan an bulhnaia awmte punin thilawmzia zawt tura kal mi 3 chu an lawng a\anga an chhuk fel hmain heng mite hian kut an lo thlak nghal nia sawi a ni. Heng mite hi an bul hnaia awm mi \henkhatin an \helh hnuah kutthlaktute hi an tlanchhe nghal a ni. Sairang khawtlang hruaitute chuan, he thil thlen lai hi Aizawl Electric veng tlangval tuitla an buaipui lai a nih thu an sawi a, thil thleng an hriat veleh Police lam pawh an hriattir nghal tih sawiin, hliamte pawh Siarang PHC panpui an nih hnuah Aizawl Civil Hospital lama thawn an nih thu an sawi a, hliam zinga mi Vanlalhriatpuia chu a luah hliam na tak a tawrh bakah a beng a\anga thi a chhuah avangin damdawi in0-ah Admit a ni a, Vanlalmalsawmtluanga chu a ban ruh a tliak a, Lalruatfela pawhin a taksa hmun \henkhatah hliam a tuara niin an sawi.

He thil thleng chungchangah hian Sairanga All NGO leh Joint VC -in vawiin khan Aizawl Press Club-ah thuthar thehdarhtute kawmin an lungawi loh thu leh he thil thleng hi an dem thu an sawi a. An khaw tlangval pathum kutthlaktute hian thingfak, lungtum leh hmanrua an neih ang ang an hmang nia sawiin, an chet dan a\angin an mi khawihte chu chu thi pawh ni se pawi an ti lo ni hiala a lan thu an sawi a. Heng mite hi an bulhnaia awm Aizawl Venghlui tlangvalten lo chhan lo phei se chuan an nunna pawhin a tawrh phah ngei an rinthu an sawi. Sairang VCP, Pu Vanrammawia chuan, an naute kutthlaktute chu man chhuaka dan anga an chunga action la ngei turin thuneihtute an phut tih a sawi a, kuttuarte inenkawlna senso zawng zawng pawh kutthlaktute hian tum sak vek tura an phut thu te, Sairang mipuite eizawnna ber balu lakna atana Lawng leh a khawl an tihchhiat man pawh tum vek tura an phut thu a sawi. Pu Vanrammawia chuan, Sairang tlawngluia intihlim tura kal \hin ten luidunga huan te, balu lakna lawng leh hmanrua te an tihchhiatsak thin niin a sawi a, hetiang thil thleng \hin hi tun hnuah thleng tawh lo se an duh tih sawiin, Tlawnga intihlim tura kal zingah mawi lo taka khawsa an awm \hin te, naupang hmuha mawi lo khawpa saruak leh hmeichhiat mipatna hmang an awm \hinte pawh tun hnuah chuan sim tawh tura an duh thu an sawi a. Heitanga khawsa an hmuh chu na taka hrem an nih tur thu leh Tlawnga intihlim tura kal turte chu ruihhlo laka fihlim tur leh an kal hmaa Sairang kawhtlang hruaitute hriattir hmasa tura chahin, tun hnuah buaina dang a chhuah tawh loh nan lui dungah Duty an in dah tawh tur thu an sawi.

Zawhna chhangin Sairang VDP chuan, an tlangvalte kutthlaktu zinga mi 4 – F Lalruatsanga, Lalrintluanga, Ramdingliana Armed veng South vek leh Nicky Lalnunmawia Salem veng chu Police ten an man tawh tih a sawi a, kutthlaktute hi an vaiin mi 12 vel nia an hriat thu a sawi.