Vawiin khan Aizawl khawpui chhung hmun hnih-ah Aizawl Traffic Police leh Transport Department Enforcement staff-ten ngaihhnathiamna tel loa lirthei enfiahna ‘ No Tolerance Drive ‘ an neih chu an chhunzawm leh a, Bara Bazar leh Vanapa Hall kawtah lirthei an endik leh a ni. Nimin nileng khan Bara Bazar-a an duty-naah lirthei 91 an man a. Vawiin-ah khan dan bawhchhia, motor 150 an man a, an zinga 78 chuan dan bawhchhiat man an chawi nghal a, vawiina an chawi zawng zawng hi Rs. 21,500 a ni. Lirthei an man tam zawk hi tlan loh nia tlan, garage certificate nei lo leh dan tesep dang bawhchhiate an ni. Traffic Police-te chuan lirthei document zawng zawng, driving license, insurance, registration certificate, learner ngai tan learners certificate, pollution certificate, commercial leh transport motor-ah fitness certificate, garage certificate bakah state dang motor te chu NOC keng tel turin lirthei khalhtute an ngen a. No Tolerance Drive hman a nih avang hian, lirthei document fel lo thahnem tak chu Transport office, pollution certificate siamna hmun leh garrage certificate laknaah te lehkha tifel turin an pung khawm a ni.
