Dr R Lalthangliana chuan, Mizoram sorkar enkawl damdawiinah MRI khawl a awm loh avanga mipuiin harsatna an tawh thu sawiin hmalak sak tur te, Lunglei District Hospital Staff Quarters sakna tur leh Kolasib District Hospital Complex-a CMO Office sakna tur te Central Vaccine Depo chungchang te NEC hotute hnenah hian a thlen a, hei bakah Bawngkawna Comprehensive Spastic Children Care Centre, sak mek ah sum 3rd installment pe chhuak thuai turin a ngen bawk.
Dr R Lalthangliana hian Pachhunga University College Cluster Academic Block thar sakna tur sum ngaihtuahsak tur te, Aizawl a College zirlai hmeichhiate tana hostel sakna tur sum mamawh a nih thu te, Lunglei Pukpui-a Mizoram Engineering College-ah staff quarters sak a \ul thu te NEC hotute hi hrilhin Mizoram hmun hrang hrangah sawhthing sawngbawlna din a nih theih nan hmalakpui turin a ngen bawk. Dr R lalthangliana chuan NEIGRIHMS bula Mizoram sorkarin ram acre 2 a zau a neih chu hmang \angaia Multipurpose Convention sak dan tur leh Hnahthiala Multipurpose Centre sakna tur sum te ngaihtuah sak turin a thlen bawk.
NEC Planning Adviser C.H. Kharsing chuan Mizoram mamawh hrang hrang an thlen te chu a theih anga bawhzui a nih tur thu a sawi a, Women Hostel leh Engineering College-a an harsatna te chu DPR siama thehlut tur leh hei hi HRD lama a lo thlen a nih tur thu a sawi a, NEC in Mizorama hna a thawh hrang hrang te Minister hi a hrilhfiah bawk.
