North Korea hrekna China, Russia leh Malaysia ten kengkawh lo niin UN-in report pe

0
567
views

North Korea in kum kalta chhung khan Khawvel ram hrang hrangte hrekna karah a ruka bungrua a thawn chhuah atangin dollar mtd 200 vel hlawkna a tel tih UN Report in a tarlang.

He thil zirchiangtu mithiam bikte’n report an siama tarlan anih dan chuan ram dang thahnem tak, China, Russia leh Malaysia te chuan North Korea hrekna hi kengkawh zo lovin, bungrua an chawlut tih a tarlang a. Syria leh Myanmar te nen pawh North Korea hian sipai lama thawh hona an la nei a ni a ti.

North Korea hian Nuclear ralthuam leh ralthuam hlauhawm dang a buaipui avangin US, UN leh EU ten an hrek mek a, hetihlai hian tuna report, UN Security Council-a thehluh takah hian North Korea hian hrekna in a huamtel bungrua te hi a la thawn chhuak thei zel tih tarlan a ni. Khawvel ram hrang hrang huama oil lama sumdawng company lian thenkhatte pawh North Korea-a oil an thawn luh thuah zirchian mek an la nih thu report ah hian tarlan a ni a. North Korea hian a rukin China, Malaysia, South Korea, Russia leh Vietnam ah te lungalhthei a la thawn chhuak ngei tih report hian a tarlang bawk.