Foreign ministry chuan nasa taka North Korea in \hat a chhuah chung pawhin US chuan a kalphung pangngai a la kalpui chhunzawm zel a, hei hian nuclear ralthuam tihtawp kawngah pawh harsatna a thlen a ni a ti. North Korea hian nuclear ralthuam a siam avangin US leh khawvel ram dang tam takin an hrek mek a, US chuan heng hrekna te hi ti tawp tur chuan North Korea chu nuclear ralthuam zawng zawng nuaibo hmasa vek turin a phut a ni.
US President Donald Trump leh North Korea hruaitu Kim-Jong-un te June thlaa an inbiak \um khan North Korea in nuclear ralthuam zawng zawng nuaibo vek se tiin an inrem a, nuclear ralthuam nuai bo tura hmalak dan tur kimchang erawh tun thlenga puanzar a la awm lo thung a, hapta liamta maia UN Report putru a\anga a lan danin North Korea hian nuclear ralthuam tih changtlun hi a la chhunzawm zel a, hei vang hian US chuan khawvel ram dangte pawh North Korea hrek chhunzawm zel tur hian a ngen a ni.
North Korea foreign ministry chuan an hmalakna chi hrang hrang a tarlang a, chung zingah chuan missile enchhin an tih tawp thu te, kum 1950-1953 Korean War-a US sipai nunna chan te ruang an thawn let thu te, Nuclear siamna hmun an tih chhiat thu te pawh a tel a, hetianga North Korea in hma a la chung hian US chuan a la ring zo chuang lo a ni a ti a, US official te chu an President Donald Trump-a duh dan kalha thil kalpui luiah leh finfiahna awm lova North Korea puh chhiatna zawng chhunzawm zelah a puh bawk.
