Padmavaat chhuah tan a ni, hmun hrang hrangah buaina chhuak nasa

0
640
views

Bollywood film ngaihven hlawh tak, Padmavaat chu ruahman lawk angin nimin khan chhuah \an a ni a, a chhuah hma velin hmun hrang hrangah a dodaltute an pung khawm nasa hle a, buaina pawh a chhuak nasa hle. Haryana leh Rajasthan-ah chuan pung khawmte hian lamlian an dan bakah bus te pawh an hal a, Uttar Pradesh leh Gujarat-ah te pawh lirthei te beih a nih bakah, dawr-te pawh an kharluih tir a, Gurgaon-a zirlai chuanna bus pakhat pawh beih a ni bawk. He bus-a chuang ve zirtirtute chuan hliam an awm lo na in, naupangte hi an thlabar hle tih an sawi a, police-te awm mah se, pung khawmte hian an pawisa lo hle tih an sawi. Heng state-a lemchan chhuahna hmun tam zawk chuan buaina chhuak leh thei reng a nih avang leh, dan leh thup>k ken kawh a harsa dawna an hriat avangin, Padmavaat hi an chhuah loh tur thu an sawi tawh a, police-te chuan buaina chhuak avang hian Mumbai-ah mi 30, Ahmedabad-ah mi 44 leh mi dang eng emaw zat, khawpui hrang hrangah an man tawh tih an sawi a, Gurgaon-a zirlai chuanna bus beitute zinga mi, mi 18 an man tawh thu leh, thubuai an ziah luh tawh thu an sawi bawk a, he bus beihna bul lawkah hian bus dang pawh pung khawmte hian an hal niin an sawi bawk.

Puan tawh angin, Padmavaat hi tun hmaa Hindu Rajput lalnu, Rani Padmini chanchin behchhana siam a ni a, mi \henkhat chuan hun kal tawh chanchin kaihlek tumna leh, Padmini chanchin dik lo taka tarlanna nia ngaiin an sawisel nasa hle a, November ni 24 khan he lemchan dodaltu pakhat chu Jaipur-a Nahargarh Fort-ah a lo inawkhlum tawh a, hemi hnu pawh hian hmun hrang hrangah buaina tenau a chhuah zeuh zeuh bakah, Lalnu Padmini chenna \hin nia sawi, Padmini Palace te pawh beih a ni a, lemchan tihlarna atana thil tarte pawh khawih a ni fo bawk a, chhuah khap tura ngenna pawh Supreme Court-ah \um li lai thlen a lo ni tawh a, Court sang ber hian sorkar hotute’n lemchan an sawisel chu \ul lo a tih thu leh, Central Board of Film Certification-in hemi chungchanga thutlukna a siam dan tura lo inrawlh ve pawh a tih tur a nih loh thu a sawi tawh a, chhuah khap tura Rajasthan leh Madhya Pradesh sorkar-te’n an ngen nawn lehna pawh nimin khan SC hian a hnawl leh a, an thutlukna chu zawm ve mai tura a tih bakah, an duh loh chuan en lo tura mipuite zirtir mai turin a ti bawk a ni.