Peace Accord MNF Returnees Association leh PRISM hruaitute chu vawiin khan Upper Republic-a Prism Pisa-ah an inkawm. An inkawmnaah hian PAMRA hruaitute chuan, thuneihna an chang a nih chuan tihhlawhtling tura an duh hrang hrang Prism hotute hnenah an thlen a, MNF leh India Sorkar-in remna thuthlung an ziah ni, kum 1986 June ni 30 hriatrengna atan Peace Tower siam an duh thu te, Peace Accord Review Committee din chhunzawm zel an duh thu te, Hnam sipai zinga in leh lo nei lote tana inhmun ngaihtuah sak tur leh chhiah chi hrang hrang awl tir tur te, an zinga Sorkar hna la thawk ve lo mi 13 Sorkar hna nghet pe tur leh Pension Scheme siam sak an duh thute an thlen a.
Prism President, Pu Vanlalruata chuan, ram leh hnam tana thih pawh huama beitute hriatrengna leh an sulhnu hlui dah thatna tur Peace Museum siam chu thil tih ngei tul a nih thu leh thuneihna an chang a nih chuan PAMRA thil phut hrang hrang chu ngaihpawimawh a nih tur thu a sawi a. Hetihlai hian, PRISM Party chu vote beisei vanga thil tiam ve mai mai ngai lo a nih avangin, PAMRA thil phut hrang hrang chu sum leh pai dinhmun enchunga ngaihtuah a nih tur thu a sawi a ni.
