Parliament-ah eptu pawl au leh, rorel inkhawm tihtawp leh, ni thum kal tluang tawh lo

0
363
views

Chhan hrang hrang vanga lungawilo eptu pawlten an auh buai avangin vawiin khan Parliament rorel inkhawm tihtawp leh a ni a, ni 3 chhung chu rorel inkhawm a kal tluang thei tawh lo a ni. Lok Sabha ah chuan vawiin nileng atan rorel inkhawm tihtawp a ni a, Rajya Sabha ah chuan chawhnu dar 2 thleng tihtawp lailawk a ni. Lok Sabha rorel inkhawm tan anih rualin Congress, AIADMK, TDP, TMC leh TRS member te chu chhuak khawmin an thil phut an auchhuahpui a, Congress leh TMC te hian Punjab National Bank-a sum tih chingpen thu an auchhuahpui laiin, TDP member te chuan Adnra Pradesh tana a bik taka enkawlna Special Status an phut thu an au chhuahpui thung a, AIADMK member te chuan Cauvery Management Board din an phut thu aupuiin, Tamil Nadu-a Periyar lim tih hmelhem an dem thu an au chhuahpui bawk. Lok Sabha Speaker Sumitra Mahajan chuan vawiin khan political party hrang hrang hruaitute kawmin rorel inkhawm tluang taka kalpui theih dan tur a sawipui a ni.