Passport Seva Kendra-in nikum chhung khan mi 4,536 hnenah Passport a pe chhuak

0
393
views

New Secretariat Complex-a Passport Seva Kendra-in nikum chhung khan mi 4,536 hnenah Passport a pechhuak. Deputy Passport Officer, Pu C. Vanlalhruaia hnen atanga Zonet thudawn danin, Passport Seva Kendra hi kum 2012 July thla atang khan Mizoramah mumal taka hawn tan a ni a, External Affairs Ministry hnuaia awm niin, tun hma lamah chuan Passport hi a dilna Form siamsa hmangin lehkha pawimawh hrang hrang nen Gauhati-ah thawn thin a ni. Kum 2015 May thla atang khan Online hmanga dilna thehluh theiha siam tan niin, lehkha pawimawh hrang hrang tihfel hnuah Guwahati atangin Dak hmangin a neitu hnenah an thawn mai thin a ni. Zawhna chhangin Pu C. Vanlalhruaia chuan, Passport diltu hi kum tin an pung chho zel niin a sawi a, kum 2015 khan Passport 1,671 an pe chhuak a, kum 2016-ah 2,974 pe chhuak lehin, nikum chhung khan 4,536 an pe chhuak a ni. Pu C. Vanlalhruaia chuan, Passport diltu zingah ram danga hnathawka kal tum an tam ber thu leh zin khawthawng tur te, sumdawnna thil leh Training leh hna pawimawh dang vanga zin tur leh ram danga lehkha zira kal tumte chu a diltu langsar an nih thu a sawi. Passport Seva Kendra hotute chuan, Passport diltu zingah lehkha lem hmanga dil an awm thin thu leh chutiang an hmuh chhuahte chu an dilna hnawl sak zel a nih thu an sawi a. Hetianga lehkha dik lo hmanga dil thinte hian an hnathawhah harsatna a siam thin avangin mipuite chu dik lo taka Passport neih tum lo turin an ngen a ni.

Mizorama Passport Seva Kendra hawn a nih hma, kum 2012 lamah kha chuan Home Department hnuaiah Passport Cell a awm thin a. Anni hian a diltute lo buaipuiin, hmunpui lamah an dilna chu an thawn sak mai thin a ni.