Pathian thuhriltu hmingthang, Rev. Billy Graham kum 99 mi niin thi

0
1421
views

Tunlai thlenga khawvela Pathian thuhriltu hmingthang Rev. Billy Graham chu nimin khan kum 99 mi niin North Carolina-a a chenna inah a thi. A thih thu puangtu Mark DeMoss chuan nizana thuthar thehdarhtute a kawmnaah Billy Graham-a thih lai hian a bulah amah enkawltu Nurse bak a chhungte tumah an awm lo niin a sawi.
A ruang hi vawiin khan Asheville-a Billy Graham Training Centre-ah lak a ni a, Inrinni zingah chhungkaw pualin tawngtai inkhawm neihpui a ni ang a, a vuina inkhawm karleh Zirtawpni a neih turah a fapa Franklin Grahama’n thu a sawi ang a, hetah hian a hla duhzawngte sak ho a ni ang. A vuina hun hman a nih zawhah kum 2007-a a nupui Ruth-i an phumna Billy Graham Library-ah phum a ni ang.
William Franklin Graham-a fapa, Billy Graham hi kum 1918 November ni 7 khan North Carolina-a Charlotte-ah a piang a, a pianthar hnu-ah kum 1947 atang khan Billy Graham Crusade neiin Pathian thu a hril tan a, US-ah chauh ni lo, khawvel pum hriat khawpin Pathian thu hril hna a thawk a, US President lo ni tawh te pawhin a thusawi ngaithla in, thusawi tur leh tawngtai turin an sawm thin a ni.