Pawl hrang hrangin vawiina MBSE-in HSLC Exam Result 2019 tluang taka a tichhuak chu lawmawm an tih thu an sawi hlawm a. Zirlai hlawhtlingte an lawmpui rualin, hlawhtlin ve rih lote chu beidawng mai lova, tumruh sauh sauh turin a chah.

0
478
views

MZP chuan HSLC Result chhuakah ram leilungfa ngeiin pakhatna a hauh chu an chhuang tak hle a ni, an ti a. Top ten-a Mizo zirlai sawmhnih lai an lang chu hmasawnna lawmawm tak a ni tih sawiin, zirlai hlawhtlinnate thinlung takin MZP chuan a lawmpui a, hlawhtling ve ta rih lote pawh hnual mai lova theihtawpa bei chhunzawm zel turin an chah a ni. MZP hian kum tina a lo tih \hin angin Top Ten-a Mizo tlingte chu May ni 8, karleh nilaini hian Aizawl Vanapa Hall-ah lawmpuina an leh dawn a ni.

MSU pawhin zirlai hlawhtlingte an lawmpui rualin, nikum pass percentage aia kumina a pass percentage zaa 8.72 laia a hniam zawk chu pawi an tih thu an sawi a. Hemi piah lamah hian zirlai pass awm lohna School 24 zet a awm chu vanduaithlak an tih thu an sawi a. Heng zirna in zinga sawrkar school paruk lai a tel phei chu thil \ha lo tak nia an hriat thu an sawi. MSU chuan top 10-a lang zirlai 20 zingah hnamdang an awm lo chu lawmawm an tih thu sawiin, Mizorama zirna in leh mizo zirlaiten hma an sawn zel theih nan MSU chuan hma ala zel dawn tih an sawi.

Students’ Self-Support Union pawhin kum danga Top 10-a lang ngai lo school a\anga top 10-a lang an awm chu thinlung takin an lawmpui tih an sawi a. Zirlai naupang hlawhtlinna sang tak neihpui thei zirtirtute inpekna chu fakawm an tih thu an sawi. HSLC Topper-te mark hmuh a sang chho ta zel chu thil lawmawm tak a ni tih sawiin, SSU chuan, HSLC Result \ha tak a awm theih nana theihtawpa beitu zirlai leh zirtirtute zawng zawng an chhuang hle tih an sawi.

National Students’ Union of India Mizoram pawhin HSLC exam zinga zirlai zaa 67.93 zetin hlawhtlinna an chang chu an lawm hle tih an sawi a. Hetihrual hian nikum aia kumina pass percentage a tlahniam ta erawh pawi an ti a, result \ha zawk a awm zel theih nan zirlai leh zirtirtute chu \an la thar zel turin an ngen a ni.

ZPM \halai pawhin HSLC pass tharte chu an lawmpui tih sawiin, Zoram tana mi \angkai tak ni tura an zir chhoh zelna turah duhsakna an hlan a. Zirlai hlawhtling ve ta rih lote pawh beidawng mai lova hlawhtling ngei tura \anla zel turin an chah a ni.