Tun kar Inrinnia PM, Pu Narendra Modi-a lo zin tur chungchanga thil pawimawhte, sorkar hotuten an sawiho. Heng mi pawimawhte hi New Secretariat Complex-a Chief Secretary Conference Room-ah Chief Secretary, Pu Lalmalsawma hovin an thu khawm a, ruahman dan chuan PM hian Inrinni zing dar 8:55-ah Lengpui tumhmun a thleng ang a, heta tang hian Helicoper-in Thuampui Helipad a pan ang a, chawhma dar 9:45 atanga dar 10:45 thleng, Aizawl Lammuala a puala vantlang inkhawm buatsaihah a tel ang a, hetah hian kawlphetha Megawatt 60 pe chhuak thei tur. Tuirial Hydro Electric Project a hawng dawn a ni. PM hian chawhma dar 11:10-ah Thuampui Helipad atangin Shillong a pan leh nghal dawn a ni. PM-in lehlanga Mizoram a rawn tlawh tur chungchanga inbuatsaih dan sawihonaah hian ven himna chungchang leh mawihnai leh tha taka lo dawnsawn dan tur sawi ho a ni a, hemi atan hian Mizoram sorkar pawh nasa takin a inpuahchah mek a ni. He sawihonaah hian Governor Secretary, CM Principal Secretary, DGP, IGP, sorkar dept, hrang hrang hotute leh sipai lam aiawhte pawh an tel a ni.
PM a lo zin dawn avang hian Aizawl District Sub Divisional Magistrate chuan vawiin atanga kar leh Thawhtan thleng, Aizawl khawpui chhung – Raj Bhavan, Chief Minister Bungalow, Lammual, Mualpuia Rajiv Gandhi Stadium leh Thuampui Helipad bul leh chung zawnah Remote Control hmanga thlalakna thlawh kualtir a khap a. He thupek hi zawm vek turin mipuite hriattir an ni a, thupek zawm lote chu dan anga hrem an ni dawn a ni.
