PM, Pu Narendra Modi-a’n cheng vbc. 1,302 chuang seng siam, Tuirial Hydel Project hawng

0
523
views

PM, Pu Narendra Modi-a’n cheng vbc. 1,302 chuang seng siam, Tuirial Hydel Project, kawlphetha megawatt 60 pe chhuak thei chu vawiin khan a hawng. A hawnna inkhawm, Aizawl Lammuala vawiina neihah thusawiin, PM chuan he Hydel Project hian kawlphethaah Mizoram a intodelh tir dawn ta niin a sawi a, Mizoram chu hmarchhak state 8 zinga kawlphethaa intodelh 3-na a ni taa, hemi hma hian Sikkim leh Tripura chu an lo intodelh tawh niin a sawi. Pu Modi chuan he Project hi kum 1998-a BJP sorkar, Pu Atal Bihari Vajpayee-a kaihhruaiin a lo pawm tawh a ni tih sawiin, hei hian kawng hrang hrangin mipuite hmasawnna a thlen dawn niin a sawi a, he Project-a tuikhuah hi hmun kilkhawr zawka khaw awmte kalpawh theihna tur te, tuikhuah chu sangha khawi nan te, Eco Tourism atan leh tui in tur mipuite pek nante a \angkai dawn niin a sawi. PM chuan Mizoramin kawlphetha megawatt 2100 siam chhuah theihna lui tui a nei tih sawiin, tunah chuan heng zinga tlem te chauh hman \angkai a la ni rih a, Mizoram hian kawlphetha tam zawk siam chhuak a, kawlphetha siam chhuahna nei lo state te hnena leitir ve chu thil tih theih a ni a ti bawk. Pu Narendra Modi chuan hmarchhak biala hmanraw changkang hmanga kawlphetha sem darhna atan sorkar laipuiin cheng vbc 1,000 a ruahman niin a sawi bawk a, ramin zalenna a hmuh kum 75-na, kum 2022-a lo thlenh tur thlirin India ram chu nasa taka tihhmasawn tum a nih thu te, thiamna \angkai tak tak awmna rama siam tum a nih thu leh, \halaite pawh anmahnia ding thei tura siam tum a nih thu te sawiin Pu Narendra Modi chuan hmasawnna rah chu mi tinin an tel tawh ang a, mipa leh hmeichhw inthliarna te leh sakhaw thil leh chi zawnga inthliarna te a awm tawh dawn lo niin a sawi.

A kaihhruai sorkarin state hrang hrang inkara hmasawnna tur leh a \ha zawnga inelna a ngaih pawimawh thu sawiin, CM-te telna Committee dinin Centrally Sponsored Scheme hnuaia sum inpek dan siam a nih thu te, hmarchhak state bik tan chuan sorkar laipui tum tur za zela 90 leh state tum tur za zela 10 a nih thu te a sawi a, ram chhunga State hrang hranga District hnufual zual, dawm kàn ngai 115 thlan chhuah a nih thu leh heng zingah hian Mizoram pawh a tel thu te a sawi a, nimin lawk khan hmarchhak bial bik tih hmasawnna atan sector pahniha hma thar lak dan tur duan a ni tih sawiin PM chuan, heng zinga pakhat, Physical Infrastructure tih hnuaiah tui, kawlphetha leh inkalpawhna atan te, Social Sector tia hriat, hriselna atan leh zirna lam atan nasa zawka hnathawhna tur duan a ni a, hemi kawngah hian hmarchhak biala state sorkarte berawn chungin hnathawh a ni dawn niin a sawi a, hemi atan hian sorkar laipui chuan hnathawhna tur sum a vaiin a tum dawn niin a sawi.

PM chuan hmarchhak bial tan kawngpui chi hrang hrang, National Highway leh a dangte siam nan sorkar laipuiin cheng vaibelchhe tam tak a ruahman thu a sawi a, Bairabi thlenga rel kawng lian chi siam a nih thu te, kum 2014-a Bairabi leh Sairang inkar rel kawng siam tur lung a phum thu te, sorkar laipui Act East Policy hnuaiah Asia chhim lam ramte nena inkalpawhna tur siam a nih thu te, heng zinga pakhat chu Myanmar leh Bangladesh tlawha Mizorama Multi Modal Transit Transport kawng siam a ni tih te sawiin, Myanmar leh Bangladesh nena ramria insumdawn tawn dan turte a tarlang a ni. Pu Narendra Modi chuan Mizoram chu lehkhathiam tamna, sap\awng thiam tamna a nih avangin Tourism lam chu nasa taka tihhmasawn theih niin a sawi a, Project pahnih, Eco Tourism leh Adventure Tourism atan sorkar laipui chuan cheng vaibelchhe 194 a ruahman tawh a, heta \ang hian hnathawh nan cheng vaibelchhe 115 pek chhuah a ni tawh niin a sawi bawk. Pu Modi chuan hmarchhak biala mau awmte chu \angkai taka hman theih a nih nan a khuahkhirhna dan, tun hma lama Forest Deptt. hnuaia awm \hin chu mimal rama mau chin bik atante chuan hlih a ni ang a, hemi hmang hian mau chingtute chuan an mau chin a\angin sum tam tak an hmu chhuak thei tawh dawn niin a sawi. PM chuan football leh infiamna danga Mizoram mi hriat hlawh khawpa lar te hming sawi chhuakin Mizoram chu khawvel hriat khawpa football-a intilar thei tur niin a sawi a, mipuite chu krismas leh kum thar lo thleng tur atan duhsakna a hlan bawk a ni.