Postal Department-in Bank thar a siam India Post Payment Bank (IPPB) chu ram chhung hmun dangte rualin Mizoramah pawh September ni 1 hian hawn a ni dawn.

0
279
views

Hemi chungchang hi hmarchhak bial enkawltu Post Master General, Pu T. mang Min Thang-a’n vawiin khan Aizawl Press Club-ah thuthar lakhawmtute a hrilhfiah a, IPPB chu Bank dang ang ni lovin Account hawngte chu hnathawktuten an in-ah kalchilhin an mamawhte an tihsak \hin dawn a, account neituten a hmuna pan kher lovin Call Centre-ah emaw SMS hmangin emaw an mamawh hun an hrilh ang a, hnathawktuten an mamawh ang an tihsak mai dawn a ni a ti. He Bank hmang hian Account-a pawisa dahluh leh lakchhuah te, Bank danga pawisa thawn te, Phone, Electric, Tui Bill leh Bill dangte pawh Online hmanga phek theih a nih bakah Direct Benefit Transfer chi hrang hrang MGNREGS hlawh lak nan te, Gas Subsidy, Scholarship leh pension lak nante hman theih a ni dawn a, Account-a pawisa awm zat bituk siam lovin pawisa an nei tlem deuh a nih pawhin chawi a awm ve dawn lova, Account hi Aadhar Card hmanga hawn tur niin, Account hawn leh pawisa chevel zawng zawng chu Paper tel loa tih tur a ni a, Account neitute kutziak chu an Signature a pawm tur niin, pawisa dahluh leh lakchhuah dawn a a Form fillup ang chi pawh a ngai tawh dawn lo a ni.

Postal Department hotute chuan, a bul\an nan IPPB hi District 6 – Aizawl, Kolasib, Champhai, Lawngtlai, Lunglei leh Serchhip District-a hmun 5-ah \heuh hawn rihphawt a nih tur thu sawiin, kumin December ni 31 ral hmain Mizorama Post Office awm zawng zawng 383 chu IPPB tih theihnaa hlankai hman vek tum a ni tih an sawi a. Tun dinhmunah chuan Post Office-a sum an kawl a tlem rih avangin ni khata pawisa khawihchet theih zat chu cheng 5,000 a ni rih phawt dawn a, a aia tam lachhuak duh tan chuan Post Office-a kalchilh a ngai dawn a ni. He Bank hian Loan a pechhuak ve dawn lova, hetihrual hian an mahni dawrtu zinga \hazualte chu Bank danga Loan an lak theih nan ruahmanna siam sakin an dilpui dawn thung a, he Bank-a Account hawngte chu Pass Book pe lovin Quick Response Card an pechhuak dawn thung a ni. India Post Payment Bank hi September ni 1 hian Prime Minister, Pu Narendra Modi-a’n New Delhi-ah a hawng dawn a. Mizoramah chuan Larsap, Pu Kumanam Rajasekharan-a’n Lal Thanhawla Auditorium-ah a hawng dawn a ni.