Pradhan Mantri Sahaj Bijli Har Ghar Yojana hnuaia Mizorama chenna in zawng zawnga eng pekna tur CM-in hawng

0
852
views

Pradhan Mantri Sahaj Bijli Har Ghar Yojana hnuaia Mizorama chenna in zawng zawnga eng pekna tur chu vawiin khan Chief Minister, Pu Lal Thanhawla’n Synod Conference Centre-ah a hawng. Hawnna thusawiin Chief Minister chuan he programme hi kum 2019 March thlaa rampum huapa tihhlawhtlin kim tum nimahsela, Mizoramah erawh chuan kumin December thla ral hma ngei a zo hman tura hnathawh tum a ni a ti a, NLUP avanga dinhmun tha zawk chang ta te chhawmdawl zuina tur programme pawimawh niin a sawi bawk. Chief Minister chuan tun hmalama eikhawp thar tawk tawkten NLUP avanga hralh chhuah tur an thar chhuah tak avangin kawlphetha tam zawk chu mamawh a ni dawn niin a sawi a, hmun fal deuha mihring chenna in awm te pawh kawlphetha pek kawnga hmaih an nih loh nan nizung chakna hmanga eng pek dan tur ruahman a ni dawn niin a sawi.
Pu Lal Thanhawla chuan Mizoramah tui chakna hmanga kawlphetha megawatt tam tak siam chhuah theih nimahsela, hei hian ramngaw, leilung leh boruak a tihchhiat theih avangin a pawilo chinah hmalak niin a sawi a, ni zung chakna solar energy pawh hman tum niin a sawi. Pu Lal Thanhawla chuan Mizoram chu kawlphetha sem darh leh pek chhuah lama rampum huapa hloh sanna ber a ni chu pawi a tih thu a sawi a, a chhan tam ber chu meter dik lo hman te, meter khawihchingpen leh kawlphetha pawhruk chin vangte nia sawiin, a veng tura tha zawka hnathawk turin hnathawktute an tan a ngai a ni a ti. Niti Ayog sawi danin Mizoram chu ram chhunga State hrang hrang zinga Gross State Domestic Product sang ber pawl a tling niin Chief Minister hian a sawi bawk a, kum 2017-2018 chhunga Mizoram GSDP punna chu sawm chuang a tling thei dawn nia hriat anih thu sawiin, hei hi sorkar hmalakna hrang hrang vang leh sorkar hnathawkte thawh that vang a ni a ti. Ram pum huapa Pradhan Mantri Sahaj Bijli Har Ghar Yojana tihhlawhtlin nan hian Rs. 1,63,20,00,00,000/- hman a ni dawn a, he Project hi Prime Minister, Pu Narendra Modi chuan nikum, September ni 25 khan a lo hawng tawh a ni.
——————

Lungleiah chuan Pradhan Mantri Sahaj Bijli Har Ghar Yojana hi DC Conference Hall-a inkhawmah DRDA Project Director, Pu K. Lalrohlua’n a hawng a, thusawiin Project Director chuan kumin December thla ral hmain Mizoram khawtina in tin eng pek hman tum niin a sawi a ni. He inkhawm hi Additional DC, Pu Benjamin Lalzama’n a kaihruai a ni.
——————–

Serchhipah pawh Pradhan Mantri Sahaj Bijli Har Ghar Yojana hi Bawrhsap, Pi Sangchhin Chinzah-in DC Conference Hall-a inkhawmah a hawng a, hawnna thusawiin, he programme Serchhip District pumpuia tihhlawhtlin nan hian Power & Electricity Deptt.-a hnathawktute bakah khawtlang hruaitute leh tlawmngai pawl ten hna an thawh ho a ngai dawn niin a sawi a ni. He inkhawm hi Power Deptt. Executive Engineer, Pu M. Lalhmingthanga’n a kaihruai a ni.
——————-

Champhaiah pawh Bawrhsap, Pu Vanlalngaihsaka’n Pradhan Mantri Sahaj Bijli Har Ghar Yojana hi Champhai Venglai Community Hall-a inkhawmah a hawng a, thusawiin Bawrhsap chuan ram puma he project tihhlawhtlin nan hian Rs.1,63,20,00,00,000/- hman ral tur a nih thu te, ram chhung hmun dangah kum 2019 December thla ral hmaa zawhfel tura ruahman nimahse, Mizoramah chuan kumin December thla ral hmaa zawhfel tum a nih thu a sawi a ni. He inkhawm hi Champhai Power Deptt. SE, Pu Lalrinmawia’n a kaihhruai a ni.
——————–

Mamitah chuan Pradhan Mantri Sahaj Bijli Har Ghar Yojana hi I&PR Conference Hall-a inkhawmah Addl.DC, Pu Jacob Lalawmpuia’n a hawng a, thusawiin Mizoramah electric eng lakluh reng reng lohna khua engemawzat a awm thu te, lakluh tawhna khuaah pawh in tam takah la pek loh anih thu te sawiin, he hmalakna hi tha taka thlawpa tihhlawhtlinpui tum turin mipuite a ngen a ni. He inkhawm hi Power Deptt. EE Pu Lalzorama’n a kaihruai a ni.