A \an nan Vengsang Biak In kawt te, Dawrkaikawnah te inkhawm buatsaihin Mizoram Assembly inthlanna lo awm tura an party thil ngaihpawimawh mipuite an hrilh a, PRISM Champhai District President, an Candidate ni nghal tur, Pu TBC Lalvenchhunga chuan he inthlanna neih turah hian midang tan ni lo, anmahni tan vote thlaka Mizoramin a mamawh mi dik leh huaisen, a \ul dana hmala ngam hruaitu atan thlan chhuah tum turin mipuite a chah a ni. Pu TBC Lalvenchhunga chuan tun hmalama hruaitu atana an thlantlin tawh te chu kum 5 chhung leka a let tam taka hausa an ni tih sawiin, eirukna leh hlemhletna laka la fihlim lo tan an candidate te chu vote chi an ni lo niin a sawi. Champhai biala PRISM candidate tur Pu TBC Lalvenchhunga chuan he inthlanna neih tura PRISM thlantlin a nih chuan eirukna leh hlemhletna lama fihlim lote hremtu tur Lok Ayukta thla ruk chhungin din an tum niin a sawi bawk. PRISM hian Champhai khawpui chhunga campaign hi chhunzawm a tum a, an campaign auhla zingah chuan Zohnahthlakte hip khawm tura hmalak te, Mizoram ram ralmuanga siam zel te, mihringte hrisel nan leh him nan te, hnathawh tur nei loten hna an hmuh theihna tur te leh hmundanga chengten Mizoram tlawh an chak khawpa changkanga siam an tum thu te a tel a ni.
