Prism President-in Total Bandh huaihawt tih chi lohah ngai

0
301
views

Prism President, Pu Vanlalruata’n Mizoram sum leh pai dinhmun a that tawk loh avangin sorkar leh mipui hnathawk thei lova siam nana Total Bandh huaihawt chu tih loh chi nia a ngaih thu a sawi a. Vawiina Upper Republic-a an pawl Pisa-a inkhawmah he thu hi sawiin, kum 2017-18-a Mizoram Budget atanga chhutin sorkar hnathawk hlawhah ni tin, cheng vaibelchhe 8 leh nuai 28 chuang mamawh a ni a, sorkarin ni khat hna a thawh loh chhung hian a hnathawkte hlawh bakah file kal loh avanga hna chawl te, pawisa vir tur chawl leh hmun dang atanga Office dawr tura zinte sum sen chu cheng tam tak a nih avangin Total Bandh buatsaih chu thil zawngchhang thlak a ni lo tih a lang chiang hle niin a sawi. Prism President chuan, Mizoram sum che vel chhutna, Gross State Domestic Product atangin kum 2015-16 chhunga ni khata Mizorama sum che vel chu cheng vaibelchhe 36 leh nuai 76 a ni a, ni khat chauh pawh Total Bandh buatsaih a nih hian Mizoramin cheng vaibelchhe 36 leh nuai 76 aia tlem lo a hloh tihna nia sawiin, hemi tuartu chu mi retheite an nih avangin ngaihtuah chian ngai a tih thu a sawi bawk. Puan tawh angin, MNF Action Committee chuan Mizoram chhunga inkalpawhna kawngpui chhe lutuk avanga mipuiten harsatna an tawh mek thlavang hauh nan tun thla ni 14 hian Mizoram pumah Total Bandh huaihawt ni se an ti a ni.