Pu Vanlalzawma’n Congress an tlak hnaih tawh vangin an thil tihah an tluang thei tawh lo niin sawi

0
366
views

MNF Party Treasurer Pu Vanlalzawma MLA chuan Congress chu an tlak a hnaih tawh avangin an thil tihah an tluang thei tawh lo niin a sawi. He thu hi vawiin a Aizawl South II MNF Block Conference Kulikawn YMA Hall a neih a hmanpuinaah a sawi a. Pu Vanlalzawma chuan, eptu pawl emaw pawl dangin an beih vak avang pawh ni lovin anmahni tal hnawk avangin an MLA pahnih chu ban an ni tih a sawi a, mipuiten hre lo tura an duh Lottery a thil dik lo awm leh NLUP a hlawhchham thu CAG in a rawn haichhuah sak te, Central YMA hmalakna in ZO Carbon hmanga dik lo taka sum siam hai lan a ni tih te leh tunhnaia vanduaina hrang hrang rawn thleng te chu Congress in an tuhrah an seng em ni tih chu zawhna awm thei a niin a sawi. Pu Vanlalzawma chuan Hnam Sipai te chu thangthar ten an ngaihlu tulh tulh niin a sawi a, Mizoram University hnuaia B.A zirlai-ah ‘Insurgency in Mizoram’ tih chu dah a nih thu sawiin hemi avang hian zirlai ten MNF hotute leh Hnam sipai te kawm an chak phah hle niin a sawi a, thangthar te-ah Mizo Nationalism chhawm nun duhna a awm chho mek a niin a sawi bawk. Inkhawm hi Aizawl South II MNF Block Vice President Pu Lalrosanga’n a kaihruai a, MNYF President Pu Lalrinmawa MLA leh he Ward Councillor Pu C.Lalthansanga ten thu an sawi bawk.