PWD Minister Pu Lal Thanzara’n ‘vanduai vang leh misual tu emaw ten lei dawh kilhna hmanrua an ruk thin avanga lei chim palh thin hi pawi kan ti a ni’ a ti

0
1122
views

PWD Minister Pu Lal Thanzara’n ‘vanduai vang leh misual tu emaw ten lei dawh kilhna hmanrua an ruk thin avanga lei chim palh thin hi pawi kan ti a ni’ a ti. Hmuntha khua community hall-a nimina neih, Tuikum Congress Block I leh II Joint Conference hmanpuiin he thu hi a sawi a, PWD Minister hian lei dawh chim vanga nunna chan palh an awm phei chu a vanduai thlak takzet a. Chutih laia vanduaina thleng politics inchirhthehna hun remchanga lo la tute hian lei an la dawh ve miah lo a ni,” a ti. Pu Lal Thanzara chuan kawng chhia leh lei chhia ringawt buaipuiah MNF party a puh a, nikumah ruahtui a tlak tam em avangin hmalak chak theih a ni lova, hna tan theih a nih veleh chak taka hnathawh nghal a ni a ti a, tun atanga hun reilote chhungin Mizoram chuan inkalpawhna kawngpui tha tak a nei tawh dawn nia sawiin, kawng chhe chanchin sawi sawi thinte hian kawng tha chanchin hi min tlangaupui ve dawn em tiin ka zawt a ni, a ti. Health Minister ni bawk Pu Lal Thanzara chuan, “Congress sawrkar laia Central sawrkarin Mizoram leh Meghalaya hnena Hospital din na tur cheng vaibelchhe 40 ve ve a pek chu thenawm state Meghalaya ten an vanneihpui em em tawh laiin, MNF party chuan a ti hlamzuih a ni a ti a, Referral Hospital changtlung tak Mizoramin a neih ve tur chu party mite contract therhlo siam nan hmangin awmze nei lovin an kalpui a. Ar vulhna hmunah an chhuah thei tawk a ni a ti a. Congress sawrkar lo ding leh chuan bul tan thar lehin medical College changtlung tak awmna tur leh Hospital changtlung tak din turin harsatna tam tak paltlangin hmalak chhoh leh a ni a. Reiloteah damlo te tan phai lam hla tak pan ngai tawh lovin, Hospital changtlung, Doctor thiam leh khawl changkang ber ber awmna, doctor tha leh thiam tak tak inzir chhuahna hmun a ni dawn a ni a ti. MPCC hruaitu Pu Sangzela Tlau pawhin thu a sawi a, Mizoram Pradesh Congress Committee (MPCC), Aizawl District Congress Committee (ADCC) leh Mizoram Pradesh Youth Congress Committee (MPYCC) hruaitute pawhin conference hi an hmanpui a ni.