Ram dang mi dan lova lo lut duh loh entirna inkhawm, All NGO Co-Ordination Committee bul tumin nei

0
469
views

Ram pum huapa ram dang dan lova lo lut duh loh entirna, vawiina New Delhi a neih rualin Mizoramah pawh All NGO Co Ordination Committee bul tumin hetiang inkhawm hi Aizawl Vanapa Hall-ah buatsaih a ni a, Central YMA General Secretary, Pu Lalhmachhuana chuan, sorkar laipui pawhin a buaipui em avangin dan lova ram dang mi lo lut ru \hin te hi thawn let an nih theih nan leh dan hmanga an chungchang ngaihtuah a nih theih nan dan \ha tak tak a nei a, heti chung hian ram a la him tawk lo hle niin a sawi. Hmarchhak state phei chu a him lo zual tih sawiin Bangladesh leh khawchhak lam atanga lo lut ru, inbenbel tum engemawzat an awm niin a sawi a, hemi avang hian Mizoram pawhin harsatna a tawk mek a ni, a ti bawk. Pu Lalhmachhuana chuan, kum 1901 chhiarpuiah Bangladesh a\anga Mizorama Chakma lo lut chu 198 chauh an ni a, kum 2011 chhiarpuiah erawh chuan mi 97,000 chuang an awm tawh tih sawiin, heng mite hi dan anga lo lut an nih vek an rin loh thu a sawi a, Mizorama cham rei tawh an nih pawhin “ram dang mi chu ram dang mi an ni” tih chu Central YMA ngaihdan a ni tih a sawi. Ram dang mi, dan lova lo lut rute hi dap chhuaha thawn let a nih theih nan kum 2009 Nov. ni 23 khan sorkar laipui chuan hma la turin state sorkar a hriattir vek tawh a, Mizoram sorkarin a bawhzui em tih chu an zawhna a nih thu leh mi eng zat nge zawn chhuah leh thawn let ni tawh tih pawh an zawhna a nih thu a sawi.

Thusawitu dang, MZP President, Ramdinliana Renthlei pawhin ram dangin an rama ram dang mi, dan lova lut rute chu an haw hle a, hetiang hian Mizo-te pawh kal ve a \ul tawh a ni, a ti a, pi leh pute ram sah zauh sa humhim turin \halaiten \an lak a \ul tawh nia a hriat thu sawiin, Chakma-ten Mizo-te dik lo taka an hek \hinna chu MZP-in a en liam mai loh tur thu leh, an duh dan chu an hlawhtlintir loh tur thu sawiin, ram leh hnam him nana \angrual turin Mizo mipuite a sawm a ni.

Central YMA President hlui, Pu Lalbiakzuala chuan, ram dang mi duh lohna lantirna hmuna kal an tlem chu inen chian a \ul hle nia sawiin, social media-a pawr tak taka \awng, a sa seha zum zuk leh tlat \hinte chu insiam \ha se a duh thu a sawi a, tun hnaia YMA General Conference-a pass, dan lova din, CADC chu dan anga \hiah a nih theih nan hma lak ni rawh se tih chu, kum 46 kal ta khan tuna \halaite hi awm sela chuan, CADC hi a pian a rin loh thu a sawi. Central YMA-in CADC \hiah a nih theih nana hma a lak turah Zohnahthlak, LADC leh MADC a tel loh thu a sawi a, hma an lakna tur chu CADC chauh a ni tih sawiin, hemi chungchangah hian Central YMA chu a chiang tawk hle niin a sawi bawk.

He inkhawm hi MSU Asst. Secretary, Vanlalliana Khiangte-in a kaihruai a, MHIP leh MUP aiawhten thu an sawi bawk.