Ram puma inkharkhip pawhsei vawi hnihnaah state \henkhat, coronavirus kai tlemna leh awm lohna hmunahte inkharkhip thlahdul phal a ni a, vawiin a\ang khan sumdawn hmun pawimawh zualte hawn \an a ni leh ta.

0
23
views

Delhi Chief Minister Arvind Kejriwal chuan India ram khawpui ber Delhi pawh nunphung pangngai angin a kal leh thei \ep tawh tih a sawi a, mipuite chu coronavirus leng kara inring renga awm turin a hrilh a ni.

State \henkhatah chuan zu, man tlawm zawka zawrh chhuah phal a ni leh tawh a, heng hmunah te hian social distancing chu khauh taka kengkawh tura tih an ni. Coronavirus kai awm lohna hmun green zone-ah te chuan zing dar 7 a\anga zan dar 7 thleng lirtheia chhuah phal a ni a, rikrum thil leh \ul zual bik thila chhuah erawh hun tiam a ral hnuah pawh phal zui zel a ni.

Delhi-ah chuan stationery dawrte, computer dawr leh dawr te sep hawn phal a ni a, mahni thiamna hmanga eizawng technician, plumber, electrician leh mi in tifaia inhlawhte chuan an hna an thawk thei leh tawh a ni.

Maharashtra-ah chuan coronavirus kai awm tamna hmunah chuan ram chhung sum lakluhna hmun chauh hawn phal a ni a, hei bakah hian mamawh \ul zual thil zuar sumdawngte chuan home delivery an kalpui thei bawk a ni.

Union Health Minister, Harsh Vardhan chuan kar hnih inkharkhip neih leh tur chu \ha taka zawm turin mipuite a chah a, he hri leng hi hnehin a awm dawn a ni a ti.

Hetihlai hian sorkar laipui ruat mi thiam rual team 20 vel chu coronavirus kai awm tamna hmun district-ah te tirh an ni a, heng mite hian Mumbai, Thane, Pune leh Bhopal te an tlawh a, inkaihhruainaa kal fuh lo laite an enfiah a ni.

Uttar Pradesh sorkar chuan Pathianni khan an inkaihhruai dan a thlirlet a, hemi hnu hian zu dawr leh industry te hawn a phal a, bus leh taxi te chu an state-a hri kai awm lohna hmun green zone-ah zaa 50 vel service a phalsak bawk a ni.

Kerala-ah chuan sorkar pisa hawn a ni leh tawh a, amaherawhchu, sorkar hnathawk Group A leh Group B te chu zaa 50 vel an kal ang a, Group C leh Group D te erawh zaa 33 zelin pisa an inkaichhawk dawn a ni. Kerala-ah hian hri kai awm lohna hmunah chuan zing dar 7 a\anga zan dar 7:30 thleng dawr zawng zawng hawn phal a ni a, Pathianniah erawh a huam lo thung.