Rangkachak chhertu lar, Nirav Modi-a dap chhunzawm zel dawn tih ED-in sawi

0
393
views

Rangkachak chhertu lar, Nirav Modi-a in, dawr leh pisa an dapna-ah Enforcement Directorate chuan rangkachak leh lunghlu cheng vbc 5000 hu an man tawh tih an sawi. ED thuneitute hian Punjab National Bank atanga Nirav Modi-a’n pawisa a tihchingpen zat, cheng vbc 11,300 hu tal an man hma chuan, an dap chhunzawm zel dawn tih an sawi a, vawiin pawh khan Mumbai-a Nirav Modi-a dawr lian leh a pisa te an dap chhunzawm leh tih an sawi. Puan tawh angin Punjab National Bank chuan Nirav Modi te upa leh a unau pahnih dangte nen, dik lo takin pawisa tam tham tak, an bank kaltlanga an lakluh bakah, bank hotute bumin ram pawn atangin pawisa an la lut tih an sawi vangin, CBI chuan thubuai a ziak lut a, Nirav Modi hian thla hmasa khan India ram a lo chhuahsan tawh avangin man dan tur ngaihtuah mek a ni a, CBI-te chuan Interpol pawh an biak tawh thu an sawi. Nirav Modi hi PNB atanga pawisa tihchingpen chungchangah tho hian thla hmasa khan dap a lo ni tawh a, an hnuaia hnathawkte puihna-in dik lo takin sum a ti che vel niin an sawi a, dan kalhin, ram pawn lamah pawisa a thawn nasa hle tih an sawi bawk a ni.
PNB chuan he thubuaia inhnamhnawih a hnuaia hnathawk mi 8 vawiin khan a chawlhtir leh a, thla hmasa lam khan mi 10 a lo chawlhtir tawh bawk a ni. Congress hruaitute chuan PM Narendra Modi-a’n Nirav Modi hi ram pawn lama insaseng turin a tanpui niin an sawi a, dik lo taka sum ti che thin a ni tih hre reng chungin Davos khawmpui-ah India mi sumdawng dangte rualin PM Modi hian a hruai niin an sawi bawk. He puhna hi Union Minister Ravi Shankar Prasad chuan pha in, he thubuaia inhnamhnawih reng reng tumah zuah bik an neih loh tur thu a sawi.