Inrinni kalta zana Reiek kawng-a Scorpio chhia hnuktu Towing Truck in Lalfamkimi hnuk tel-a thia chhar a nih chungchangah, Police te chuan Towing Truck khaltu Lalliansanga chu lirthei khalh fimkhur lo leh inthlahdah thubuai an siam sak. Inrinni kalta zana Mission Vengthlang atanga Reiek panna kawng, Bungkawn Nursery huamchhunga Towing Truck-in Scorpio chhia a hnuh paha a hnuh tel nia hriat Lalfamkimi thih dan hi Police te chuan ngawrh takin an chhui zui zel tih an sawi a. He thil thleng kaihhnawih-ah hian mi engemawzat thu an zawhfiah tawh thu leh thil thlen dan dik tak hi chiang taka chhui chhuah ngei an tum thu an sawi a, hma pawh an sawn hle tih an sawi bawk. Puan tawh angin Inrinni kalta zan khan Towing Truck Lalliansanga Kum 42, Durtlang Melnga ami khalh chuan Reiek lam atangin Scorpio chhia a hnuk a. Zan dar 7:40 vel-a he motor inhnuk tawk zawnga tlan Sumo driver chuan motor in hnuk hian mihring a hnuk tel niin a hmu a, an mahni tawk zawnga Car tlan te chu hrilhin an um nghal a, motor in hnuhte an um phak hma hian Lalfamkimi ITI veng ruang kawng laiah lo let reng chu an hmu ta a ni.
