Republic Day lawmna inkhawma Rahul Gandhi tlar hmaa thuttir a nih loh vangin Congress leh BJP inhnial

0
461
views

Sorkar laipuiin Republic Day lawmna inkhawm a buatsaiha Rahul Gandhi tlar rukna-a thuttir a nih avangin, Congress leh BJP te an inhnial nasa hle. Puan tawh angin Rahul Gandhi hi tlar lina-a thuttir tum a ni zet a, tlar rukna-a Rajya Sabha-a eptu pawl hruaitu, Ghulam Nabi Azad-a bulah sawn a ni leh a, hei vang hian Congress thupuangtu Randeep Surjewala chuan thutna rem dan chu politics tenau khelh tumna holam tak nia a hriat thu leh BJP sorkar-in tih dan phung pangngai an bawhchhia niin a sawi a ni. BJP media cell Convener, Anil Baluni chuan thutna rem dan hi Congress kaihhruai, tangrual pawl, UPA sorkar ruahman kha a nih thu leh, Congress sorkar lai pawh khan khatih laia eptu pawl party hruaitu, Nitin Gadkari leh Rajnath Singh te pawh tlar 11-na ah thuttir thin an nih thu te leh, Lok Sabha leh Rajya Sabha eptu pawl hruaitu, Sushma Swaraj leh Arun Jaitley te pawh tlar hnunga thuttir thin an ni a ti a, an thutna hi a hnun em vangin, Gadkari leh Rajnath Singh leh Sushma Swaraj te phei chuan Republic Day lawmna inkhawm an chhim ngai lo niin a sawi bawk a ni. Congress hruaitu chawl ta, Sonia Gandhi kha kum thum vel chu tlar hma-ah thuttir thin a ni a, a fapa, Rahul Gandhi-a’n a thlak hnuah, a nu dawn thin ang duhsakna te kha a dawng ve lo mai niin mi thenkhat chuan an sawi a ni.