Republic Veng Joint Action Committee chuan, kum 2015 January ni 9-a an veng mi, pawi sawi lo mi 5, rawng taka thah an nih chungchangah, dik taka rorel a nih theihna tur daltu an awm chuan Republic khawtlangin a \ul angin an hmachhawn zel dawn tih an sawi. Hemi chungchanga vawiina Republic Local Council, YMA, MUP, MHIP leh VDP-te telna Joint Action Committee thuchhuah chuan, kum 2015 January ni 9-a, Pu Sangliansiama te chhungkua-a mi 5 lai, rawng taka thah an nih champha a lo thlen hian, Republic khawtlang chu an rilru a na thar hle niin an sawi a. Hetiang thihna rapthlak hi tun hnuah Zoram khawi hmunah mah thleng tawh lo se an duh thu sawiin, rawng taka mi 5 lai that a, naupang rilru thianghlim tak pawh zuah lova hmelma ang maia diriam taka nghaisatu, Laltlanchhuaha chungchanga an thuchhuah tawh, he tualthattu hi khaihlum ni rawh se, tihah Republic Veng Joint Action Committee chu a la ding nghet tlat tih an sawi nawn leh a, Laltlanchhuaha hi Republic Veng khua leh tui a nihna an hlihsak tawh avangin, thiin emaw, damin emaw, Republic Veng-ah a luh an remti loh thu an sawi nawn leh bawk.
