Ropeway Cable Car Landing Station hmun tur leh Sakawrhmuituai tlanga ‘Skywalk’ siamna tur hmun Tourism Minister-in tlawh

0
468
views

Tourism Minister, Pu John Rotluangliana’n Durtlanga KV Multipurpose School bula Ropeway Cable Car Landing Station hmun tur leh Sihphir leh Lungdai inkar Sakawrhmuituai tlanga ‘Skywalk’ siamna tur hmun a tlawh. Ramchhung leh pawna khualzinte hipna atana Tourism Department hmalakna chu sorkar laipui pawhin a phurpui a, heng hmun pahniha Ropewy leh Skywalk siamna atan hian cheng vaibelchhe 99 hmuh a ni a ti a, 1st leh 2nd installment pawh dawn fel tawh a nih thu a sawi. Ropeway hi Chaltlanga Tourist Lodge leh Durtlanga KV Multipurpose School inkarah siam tur a ni a, hei hi Asia-a Ropewy sei ber tur a ni a, Sakawrhmuituai tlanga Skywalk siam tur hi India rama a hmasa ber a nih dawn bawk avangin khualzin pawh hip hle tura beisei a ni a, a siam hna hi New Delhi-a Leading Edge Pvt Ltd.-in a thawk dawn a ni. Nimina Pu John Rotluangliana’n heng hmun a tlawhnaah hian Assembly Dy. Speaker, Pu R. Lalrinawma, Tourism Director, Pu Biakthanmawia Pautu leh Department hotute dangte, New Delhi-a Leading Edge Pvt Ltd. hotu Captain, Satish Pathania leh Company Consultant dangte bakah Durtlang, Sihphir leh Lungdai khawtlang hruaituten an tawimawm a ni.

Tourism Director, Pu Biakthanmawia Pautu chuan, Skywalk hmunah hian mountain biking, nature walk, restaurant leh dawr chi hrang hrang siam tum a nih thu leh lirthei dah-na tur pawh felfai taka ruahman tum a nih thu a sawi a. Skywalk hi India rama a hmasa ber tur a nih avangin Mizote ngei pawhin an hlutin an tlawh chak ber hmun a nih an beisei tih a sawi a ni.