Russia-ah khualzin phur thlawhna chesual, mi 71 thi

0
408
views

Russia ram-a khualzin phur thlawhna, Saratov Airlines jet pakhat chu Moscow khawpui Domodedovo tumhmun atanga a thlawh chhuah hnu rei lote ah nimin tlai lam khan chesualin, a chhunga chuang mi 71 te an thi vek. Thuneitute chuan thlawhna tlak chhan hi khaw awmdan zir loh vang nge, khawl lam fel loh vang nge, thlawhna khalhtuten tih sual neih vang nge tih an chhui chiang nghal a, mifirfiakte chetna a ni thei em tih lam erawh an sawi lang tel lo thung. Antonov An-148 hi Moscow khawpui chhim chhak lam km 80 vela hla, Argunovo khaw daiah a tla a, thlawhna keh darh them hi hmun hrang hrangah a darh a, chhanchhuah hna thawktute chuan lirtheia kal theih chin bakah ke-a panin, thlawhna tlakna hmun hi an thleng a, Accident Investigation Agency thupuangtu Svetlana Petrenko chuan ruang zawn hna thawhna turin ni khat aia tlem lo an mamawh dawn tih a sawi. A tlak hma hian thlawhna hian harsatna an tawh thu pawh a thawn chhuak lo a, Flight Recorder pakhat chu chhar tawh a ni. President Vladmir Putin chuan mitthi chhungte a tawrhpui thu a sawi a, US leh UK sorkar te pawhin he chhiatna thleng hi pawi an tih thu an sawi bawk. Thlawhna hi Pathianni chawhnu dar 2:47 ah a thlawk chhuak a, minute rei lote hnuah biak pawh theih lohvin a awm nghal a, a chesual lai lo hmutute chuan thlawhna hi a tlak hmain a kang niin an sawi. Thlawhna-a chuangte nihna kimchang pawh puan a ni tawh a, passenger 65 bakah thlawhna enkawltu 6 an chuang a, passenger zingah hian naupang pakhat leh rawlthar pahnih an tel a ni. Thlawhna khalhtu hi pilot tawnhriat nei tha tawk tak, darkar 5,000 chuang thlawhna lo khalh tawh a ni tih Ria-Novosti News Agency chuan a sawi.