Russia thlawhna chesualah mi 39 an thi

0
316
views

Syria ram pan, Russia thlawhna chesualah mi 39 an thi. Russia thuneitute chuan thi-te hi sipai vek an ni an ti a, thlawhna hi khawl lam fel loh vanga chesual a nih thu leh, hmelma kah vang a nih loh thu an sawi a, meter 500 velin \umhmun a thleng hman lo a ni. Russia hian Syria-a an mi leh sa thite hi sipai an nih thu a nemnghet ngai meuh lo a, tuna Syria ram buainaa a inrawlhna-ah pawh hian sipai engzat nge thi tawh tih chiang taka hriat theih a ni lo. Kum 2015 September thla atanga a inrawlh hnuah, indonaa thi, Russia sipai 44 an awm tawh nia chhinchhiah a ni a, hemi zingah hian thla hmasa lawka hel pawlte kah thlak indo thlawhna khalhtu pakhat pawh chhiar tel a ni a, thlawhna atang hian in perh chhuak mahse, hel pawlte nen an inkah zuina-ah, kah hlum a ni ta a ni. Hei bakah hian kum 2016 December thla khan Russia sipai rimawi lam thiam, Syria-a kal turte phurtu thlawhna chesualah, sipai 92 an lo thi tawh bawk a ni.