Home Minister, Pu R. Lalzirliana chuan Saitual Saihmartlanga Helipad thar nimin khan a hawng. Hawnna thu sawiin Pu R. Lalzirliana chuan he Helipad thar hi Saitual khaw mipuite tan tangkai em em tur niin a sawi a, a panna kawng pawh NEDP sum hmanga siam a ni dawn niin a sawi a, mipuite chu sorkar hmalakna ngaichang thiam tur leh thlawp zel turin a chah a ni. He inkhawma khualzahawm.
Lt. Col. ZS Zuala, MLA pawhin thu sawiin he Helipad hi zin duhte bakah damloten an chhawr tangkai hle dawn niin a sawi a ni. Hawnna inkhawm hi GAD, Civil Aviation Wing Deputy Controller, Pu Saidenga’n a kaihruai a, hetah hian Chief Engineer, Roads, Pu R. Lalrintluanga chuan he Helipad neitu nihna leh enkawl hna hi Civil Aviation Wing kutah an hlan nghal niin a sawi a, he Helipad siam nan hian
DoNER Ministry atanga sum hmuh Rs 49,69,000/- hman niin a sawi a ni.
Home Minister hian Saitual Block MHIP Conference a hmanpui bawk a, thu sawiin Pu R. Lalzirliana chuan tunlai hmeichhia te zingah zirna lamah leh eizawnna hnathawh lamah mipa tluk loh khawp an awm tawh niin a sawi a, hmanlaia Mizo nundan nen khaikhinin thil awmdan danglam tawh zia a tilang a, hetiang dinhmun tha thlen tir tu hi midang ni lovin anmahni hmeichhia te vek niin a sawi a ni. Pu R. Lalzirliana chuan khawtlang rorelnaah pawh danin a phut angin hmeichhia te an tel chho vel zel niin a sawi a, khawtlang rorelnaah hmeichhia te chu thahnemngaihna nei tur leh ram leh mipuite tana inpekna neih tum turin a chah bawk a ni.
