Saitual District Implementation Demand Committee chuan Saitual District siam tura chak zawka sorkar nawr nan Tawi East Block Congress leh Unit zawng zawngte chu an seal dah vek turin an ngen dawn. Hemi chungchanga thutlukna hi Saitual District Implementation Demand Executive Committee, an Chairman, Pu Rohmingliana kaihhruaia vawiina Saitual Auditorium-a thukhawm chuan an siam a, an thilphut, Saitual District siam thuai tura sorkar an ngenna dawhthei tak leh tharum tel lova an nawr chu chak zawka kalpui a ngai ta niin an ngai a, Tawi East Congress Block leh Unit te an seal dah tura ngen an tum bakah kawnga hmalak dan tur chi hrang hrang an duang bawk a, hemi chungchangah hian zau zawka inrawnkhawmna tun thla ni 9, Zirtawpnia neih tura thu dah a ni. He inrawnkhawmnaah hian an Demand Area-a VC hrang hrangte pawh sawm tel an tum a ni.
