Saudi Arabia-in hmeichhiate motor khalh phal sak tawh dawn

0
331
views

Hmeichhiate motor khalh phalsak an nih lohna ram awm chhun, Saudi Arabia ram lal, King Salman chuan nimin khan hmeichhiaten lirthei an khalh ve tawhna tur thupek a chhuah. He thupek ang hian hmeichhiate lirthei khalh phalna dan hi mi thiamten ni 30 chhung an zir chian hnuah motor an khalh ve thei dawn ta a, nakkum June ni 24-a hman \an theih turin dan thar siam a ni ang a, he dan thar hi Muslim sakhaw dan, sharia nena kal khawp tur a ni bawk. Saudi Arabia ram thutlukna avang hian an ram hmeichhiate leh ram dangte pawh an lawm hle a, US State Department pawhin kawng dik tak lama ke penna nia sawiin, President, Donald Trump pawhin a thlawp tih a sawi a ni. Muslim sakhaw lo pian chhuahna ram, Saudi Arabia-ah hian hmeichhiate hi mipa thu hnuaia awm tura danin a rel avangin, thutlukna tenau te te-ah pawh mipa remtihna neih zel a ngai a, an lehkha zirna chungchang te, hna thawh leh pasal neih te, zinna turte leh damdawi ina inenkawl tur pawhin, an pasal emaw, an pate emaw remtihna an lak zel a ngai a ni. US-a Saudi Arabia palai, Prince Khaled bin Salman chuan an ram hmeichhiate hian Driving License nei tur emaw, lirthei khalh tur emaw-in mipa remtihna an lak kher a ngai tawh dawn lo tih a sawi a, an ram chhung khawi hmunah pawh lirthei an khalh theih dawn bakah, he phalna hian an \henawm ram, Gulf Cooperation Council-a inziak lut hmeichhia, lirtheih khalh phalna neite pawh a huam vek tur thu a sawi a ni.