Seling leh Champhai inkar kawng tlang tawh

0
782
views

Seling leh Champhai inkar kawng, nimin chawhnua lung lian pui pui tlain Khawzawl leh Tuipui inkar, Seling atanga km 95-naa a hnawh pin chu lir thei chi tin kal theiha siam tlang a ni leh tawh a, kawng enkawltu, PWD hotute hnen atanga thu dawn danin lung tla hi hal darh ngai a nih avangin hnathawh chak a harsa a, tuna motor kal theiha siam a nih hnuah pawh kawng sira lung la awmte chu hal darha then fai zui a ni ang. Puan tawh angin Seling leh Champhai inkar, National Highway 6-ah hian kawng siam hna chak zawka thawh a nih theih nan leh he kawnga tlan motor lian chhuk leh chho zawnga tlan tan inpelh a harsat avangin Saitual SDO Civil-in motor lian kal theih ni a ruat a, naktip, Thawhtanni atanga hman a ni ang a, Champhai atanga Seling lam pan turte chu Thawhtanni, Nilaini leh Zirtawpni-ah an kal thei ang a, Seling atanga Champhai lam pan turte chu Thawhlehni, Ningani leh Inrinniah an kal thei dawn a ni. Champhai Dist. Bawrhsap chuan, Motor lian, ke 6 aia tam nei chu he kawngah hian tlan a khap bawk a ni.