Sesawng leh Khawruhlian inkara Tuirini lei chimna bul lui hnar lama thir lei dang, Bailey Bridge fur laia hman lailawk tur hmanhmawh taka dawhna turin lei nghah chhan phumna tur lai tan

0
725
views

Sesawng leh Khawruhlian inkara Tuirini lei chimna bul lui hnar lama thir lei dang, Bailey Bridge fur laia hman lailawk tur hmanhmawh taka dawhna turin lei nghah chhan, concrete block phumna tur laih tan a ni. ZONET zawhna chhangin PWD Chief Engineer Highway changtu, K. Lalsawmvela chuan lei innghahna tur concrete block siamna tura lui dung sira laih khuar hna hi JCB hmanga thawh a ni a, amaherawhchu, thuk lo te laih a nih hnu-ah lung chang tak tak a awm avangin lung verhna khawl hmanga lung verha, hal a ngai dawn a, tunah hian lung verhna air compressor khawl ngaihtuah leh mek a ni a, reilote-ah buna, chak taka hnathawh zui dan tur ngaihtuah a ni dawn a ni. Highway Chief Engineer chuan Khawruhlian, Darlawn leh Sakawrdai tlang dunga awmten kumin fur lo thleng tura harsatna an tawh lohna turin he lei hman lailawk tur hi NEDP sum hmanga dawh tum niin a sawi a, heta tan hian Mizoram sorkar chuan Rs. 2,10,00,000/- a ruahman tawh a, hei hi sanction a nih theih nan tunah hian thil tihfel ngaite tihfel mek a ni a, hetih chhung hian he lei dawh thatna hmanrua atan Chhingchhipa National Highway 54 chhuat bal laia thirlei dawh, a hèlna kawng siam a nih tawh avanga hman tawh loh chu tunah hian thiat tura inbuatsaih mek a ni a, he lei dawhna hmanrua hi a tam tawk loh chuan Tuirini lei hlui thiahna hmanrua la hman theih ang te pawh hman a ni dawn a ni. Hetihlai hian he lui kanna lei dawh lai, tun thla ni 13 zinga chim ta enfiah hna leh a chim chhan zawn chhuah hna chu Aizawl Bawrhsap kaihhruai, Magisterial Enquiry-in a thawk mek a ni.