Sesawng leh Khawruhlian inkara Tuirini lei dawh lai chim

0
900
views

Sesawng leh Khawruhlian inkara Tuirini lei dawh lai chu vawiin chawhma 9:45 vel khan a chim a, lei chim laia zawhtu mi pahnih zinga pakhat a thi a, midang pawh hliam na tak tuarin damdawi inah dah a ni. Sesawng Branch YMA hruaitute hnen atanga thudawn danin lei chim vanga thi hi HC Lalfakzuala, kum 45 mi, Sesawng Venglaia Pu L. Kamlova fapa a ni a, a ruang hi lak a nih hnuah vawiin khan Thingsulthliah damdawi inah doctor endik tir a ni a, hemi hnu hian Sesawnga an chenna inah lak leh tawh a ni a, naktuk chhun dar 12-ah vui a ni ang. Hliam dang pakhat, Laltleipuia, kum 27 vel mi, Pu HC Lalfakzuala farnu fa pawh Thingsulthliah damdawi inah dahluh a ni a, a biak theiha, amaherawhchu, a thil hriat dan a mumal vak lo niin thu dawn a ni. Heng mite pahnih hi Tuirini kam lehlam Khawruhlian lama thingzai tura kal an ni a, thir lei, ‘bailey bridge’ dawh thar, a chhuat la phah loh chu zawhin an kal phei a, lei lai vel an thlen laiin he lei hi a chim ta a ni. Lei chim chungchanga PWD thuchhuah tarlan danin he lei dawh lai hi kum 1973-a BRTF lei dawh hlui leh chhe tawh thlakna tura PWD Highway Division II-in a dawh lai a ni a, he thir lei, ‘triple double re-inforced’ hi 30R loading class, ton 38 dawl zo tura ngaih a ni a, lui kam tawn tawna a innghahna turah pawh lei hmawr chu innghah tir a ni tawh a, lei hlui ruhrel zawng zawng pawh thiah vek a ni tawh a, hetihlai hian a chim ta mai a, a chim chhan hi chhui chian a nih phawt loh chuan tun dinhmunah sawifiah theih a la ni rih lo niin an sawi a ni. PWD thuchhuah chuan he lei chim vanga mihring nunna chan leh hliam an awm chu pawi an tih thu an sawi bawk a ni. Chief Minister awm loh hlana a aiawhtu, Home Minister, Pu R. Lalzirliana hovin a Pisaah vawiin khan he lei chim chungchang hi sawiho a ni a, thil awmdan dik tak chhui chhuak turin Aizawl Bawrhsap, Dr. A. Muthamma kaihhruai tur Magisterial Inquiry din ni se, Inquiry din atanga thla 3 chhungin a report sorkarah thehlut se tih a ni. He meeting-ah hian Home Minister, Pu R. Lalzirliana chuan Tuirini lei dawh that mek chim vanga vanduaina thleng chu pawi a tih thu sawiin, hemi chungchanga Social Media-a thudik tawk lo thehdarh awm chu tha lo a tih thu a sawi a ni. He meeting hian lei chim vanga thi ta Sesawng Venglai mi, Pu HC Lalfakzuala chhungte hnenah zangnadawmna cheng nuai 4 leh he lei chim vanga hliam, Laltleipuia Thingsulthliah damdawi ina enkawl mek tanpuina pek a remti a, an thutlukna siam hi bawhzui a, a tul dan anga thil ti nghal turin Chief Secretary, Pu Lalmalsawma ruat a ni. He emergency meeting-ah hian PWD Minister, Pu Lal Thanzara, Supply Minister, Pu John Rotluangliana, Industries Minister, Pu H. Rohluna, Dy. Speaker, Pu R. Lalrinawma, Fisheries Minister, Pi Vanlalawmpuii Chongthu leh Mizoram Law Commission Chairman, Pu John Siamkunga te an tel a ni.