Shillong Annual Freshers’ Day vawi 38-na hmang

0
675
views

Mizo Students’ Union, Shillong Annual Freshers’ Day vawi 38-na chu nimin khan Shillong-a U So So Tham Auditorium-ah hman a ni a, khuallian, School Education Minister, Pu H. Rohluna chuan zirlaite chu an chhungten Shillong-a lehkha an zirtir chhan theihnghilh lo tur leh, hmasawn tura inelna chi hrang hrangah nasa zawka inhmang turin a fuih a, ram pum huapa hna sang thawk tur thlanna, All India Level Competitive Exam-a tun hnai atanga Mizo hming lang tlem te, zirna in tha, IIT leh IIM-ah te, Mizo hming a lang tlem te chu pawi a tih thu sawiin, heng inelnaah te hian tan la turin a fuih a ni. Pu H. Rohluna chuan Social Media hman nasat avanga lehkhabu chhiar ngaihthah lo tur te, a tha lo zawnga Social Media hmang lo turte-in zirlaite chu a fuih bawk. MSU Shillong Freshers’ Day-a khual zahawm, Pu R. K. Lianzuala pawhin zirlaite chu tun atanga an hun neih kum 10 chhung tha taka hman tum hram turin a chah a, zirlai an nih laia nun khawlo laklawh tawhte tan nun kawng dika let leh a harsa tawh thin tih sawiin, insum tulna leh mahni inthunun tulnaah tan la turin a fuih a ni. Eizawnna kâwk thiamna neih a tul thu leh, Graduate leh Post Graduate degree tha tak tak nei, ei zawnna lama harsatna tâwk an tam tawh avangin tinzawn fel tak neia lehkha zir a tul thu a sawi bawk. Shillong-a Mizo Students Union Freshers Day-ah hian Meghalaya Assembly Speaker hlui leh Minister hlui, Pu Charles Pingrope pawhin thu a sawi a, MSU President, Lalthanpuia Hrahsel-in thu a sawi bawk. He Freshers Day-ah hian zirlai tithate chawimawi an ni a, chawhnu lamah Miss Contest leh intihhlimna dang hman a ni a, Miss Mizoram, Rody leh a thiante pawhin an hmanpui a ni. Shillong MSU Freshers Day-ah hian College hrang hrang leh NEHU-a zirlai lût thar thahnem tak an tel a ni.