Shillong Mizo Kohhran chungchanga thuchhuah siam bak thehdarh lo turin ngen

0
356
views

Shillong-a Mizo Kohhran Biak In, Presbyterian Kohhran leh Baptist Kohhranin an inhman tawm thin leh he Biak In neitu nihna chungchanga ngaihdan inang lohna awm, tun thla ni 4-a chin fel tak chungchangah Kohhran pahnih Joint Committee te chuan inremna siam tak chungchanga thuchhuah a siama tarlan bak theh darh lo turin chanchinbu, electronic media leh social media te an ngen. Hemi chungchanga Kohhran pahnih Joint Committee hruaitute hnen atanga ZONET thu dawn danin, Shillong-a Mizo Kohhran Biak In hman dan leh neitu nihna chungchanga ngaihdan inang lo tun hma lam, hun rei tak atanga lo awm tawh, Thlarau thianghlim hnathawh avanga chin fel tak chu inremna boruak tha tichhe thei zawnga sawi theih a la nih avangin Kohhran pahnih Joint Committee chuan a chhe zawnga thil sawi leh thu thehdarh ven tul niin an hria a ni. Shillong Fire Brigade hmuna Baptist Kohhran indanna atana BCM Kohhran Hqrs. Serkawnin ram a lei hi Square feet 7,660-a zau a ni a, Biak In hmun tur lei nan hian Presbyterian Synod pawhin sum a thawh a ni. Puan tawh angin he inremna thu thlung hian kum 43 kalta atanga inepna leh inrem lohna an lo neih tawh a ching fel ta a, Remna thuthlung siam tak lawm nan hian thla leh, October ni 14 leh ni 15-ah Shillong Mizo Kohhran Biak Inah hian a lawmna ruai theh a ni ang.