Sorkar laipuiin MP leh MLA-te thubuai ngaihtuah tu tur, Special Court din a remti

0
296
views

Sorkar laipuiin MP leh MLA-te thubuai ngaihtuahtu tur, Special court din a remtih thu, Supreme Court a hrilh a, kum 2014-ah khan MP leh MLA 1,581 thubuai chu a vaiin 13,500 a ni a, hemi hnuah hian a pung leh nasa hle tawh nia hriat a ni bawk. Heng thubuaite hi chin fel mai a ni thin lo a, dan bawhchhia, hrem turte pawh hrem lohvin rei tak tak an awm thin a, hei vang hian Special court din a, rang zawka chin fel dan tur ngaihtuah ni se tih a ni ta a ni. Sorkar laipui chuan, hetiang Special court hi 12 din phawt ni se a ti a, a senso atan pawh cheng vbc. 7 leh nuai 80 a ruahman nghal a, MP leh MLA-te thubuai lak khawm fel a nih hnuah, a vaia Special court mamawh zat chu din theih a nih tur thu a sawi. Supreme court hian politician-te thubuai chin fel loh tam lutuk chu rang zawka chin fel a nih theih nan special court hi din turin sorkar laipui a lo hrilh tawh a, kum 2015-ah khan hriattirna pawh a chhuah tawh a, tun thla tir lamah khan sorkar chu chak zawka bawhzui tur leh, thubuai reng reng, kum khat chhunga chin fel a nih ngei theih dan tur tihfel a tul thu a hrilh nawn leh a ni.

Supreme Court-a Judge pahnih, Ranjan Gogoi leh Navin Sinha chuan, court thiam zawk 17,000 velin thubuai chin fel tur 4,200 vel an neih theuh avangin, Special Court hi din a tul hle tih an sawi a, thla hmasa khawn Election Commission chuan MP leh MLA, thiam loh chantir tawhte chu inthlan chuh khap nise a ti bawk a ni. Hemi chungchang ngaihtuahnaah hian court sang ber chuan Election Commission pawh na takin a khak a, inthlan tihthianghlimna tur leh, hemi atana dan siam kawnga ngawi rei lutukah a puh a, Commission aiawh, Meenakshi Arora leh Mohit D Ram chuan, hemi chungchang hi sorkar an hriattir tawh thu an hrilh ve thung a, sorkar laipui aiawh chuan, hemi chungchang hi ngaihtuah mek a nih thu sawiin, sorkarin MP leh MLA, an thubuaia thiam loh chang tawhte, an dam chhunga inthlan chuh thei tawh lo tura hrem chungchanga Law Commission leh Election Commission rawtna hi a zir chiang mek niin a sawi.