Sorkar laipuiin State Bank of India-a Account nei zawng zawng a\anga chhiah a lak tur, Tax Deduction at Source chungchangah vawiin khan ZPM Group Leader, Pu Lalduhoma’n Assembly Budget Session-ah Attention motion a pulut.

0
222
views

Pu Lalduhoma chuan, tun hma zawng chuan Tribal-te chu chhiah awl tir an ni \hin tih sawiin, mipuiten chhiah an chawi ve ngai lova. Hei mai hi ni lovin Mizorama awm sorkar official-te pawh chhiah hi awl tir an ni \hin a. Hetiang a nih mek lai hian tun hnai khan Sorkar laipui chuan thupek thar tichhuakin Tribal-te pawh huamin SBI-a Account nei zawng zawng kum khata Annual Interest Rs. 10,000 leh Senior Citizen Annual Interest Rs. 50,000 nei chu chhiah chawi tir vek turin a ti a. Hei bakah hian Pan card nei lote chu 20% chawi tir tura tih an ni bawk nia sawiin, tuna a lan danah chuan Income Tax Department a\anga chhiah awl phalna nei tih loh SBI a Account nei Mizo mipui zawng zawngin chhiah hi an chawi a ngai dawn a, chhiah awl phalna nei tur chuan Silchar-a zuk dil a ngai a, chu pawh kum 1 chhung bak a nun dawn loh avangin Mizo mipuite tan harsatna nasa thlentu a nih thei dawn tih sawiin, SBI hi tlansana Bank dang dawr a nih pawhin hetiang ruahmanna hi siam zel a nih a rinawm avangin Sorkar chu a rang thei ang bera hmala tura a duh thu Pu Lalduhoma chuan a sawi a. He thil chungchangah hian Mizoram sorkar chu hmarchhak biala State dangte thawhpuiah sawm a, he ruahmann hi sut a nih leh theih nana rang taka hmala tura a duh thu a sawi a ni.

Hemi chungchangah hian House Leader, Pu Zoramthanga chuan, a \ul a nih phawt chuan zirchian a, hmalak tur chi a nih chuan hmalak nghal a nih tur thu House a hrilh a. Tunhma chuan Tribal mite chu Income Tax awl tir \hin an ni a, tunhnaiah thupek thar siam a, Income Tax hi chawi tura an ti a nih phawt chuan hmarchhak biala state dangte be rawna hmalakpui a ngai dawn tih a sawi. Pu Zoramthanga chuan, hemi chungchangah hian Sorkar pawhin theihtawp a chhuah dawn tih sawiin, tih tur \ul awmte chak taka bawhzui a ni dawn tih a sawi a ni.