South Africa President, Jacob Zuma inhnukdawk ta

0
382
views

A party in na taka a nawr avangin South Africa President Jacob Zuma chu a inhnukdawk ta. TV kaltlanga thu sawiin Zuma hian a ban thu a puang a, African National Congress ANC rorel dan erawh a pawm loh thu a sawi thung. ANC hian Jacob Zuma hi a bang lo a nih chuan Parliament ah amah rin tawk lohna motion puluta ban tir tho a nih tur thu an hriattir a. Kum 75 mi Zuma hian thuneihna chu ANC hruaitu, Cyril Ramaphosa kutah a hlan dawn a ni. Zuma hian kum 2009 atangin ro a rel a, eirukna thubuai chi hrang hrang a nei mek a. Nimin lam khan Police te chuan a thurualpui pakhat Gupta chhungkaw chenna Johannesburg ami chu an lo dap tawh a ni. A ban thu a puan dawn hian Zuma hian fiamthu thawhin chanchinbumite chu engvanga thutak hmelpu viau nge an nih a zawt hmasa a, kum tam tak a lo thawhpui tawhte chungah lawmthu sawiin, ANC chhungah tharum thawhna leh in thendarhna a thlen avangin a ban a tul ta tih a sawi a, amah avanga mi tumah an inlungrual loh phah a duh loh thu sawiin ANC pawh amah vanga a chhiat a remti lo tih a sawi a, ANC thutlukna siam dan chu pawmpui lo mahse, ANC member rinawm tak a nih avangin a bang ta tih a sawi.