Special Summary Revision of Electoral Roll tan a ni

0
368
views

Election Commission ruahman angin Mizoram pum huapin Electoral Roll ennawnna, Special Summary Revision of Electoral Roll chu vawiin khan \an a ni. A \an nan hian tuna Mizoram Assembly Electoral Roll ding lai, vawiin a\anga Draft Roll chang ta chu District hrang hranga Bawrhsap Office-ah te, ERO Office-ah leh BLO Office-ah te a duh apiang en theih tura tar chhuah a ni a, ram khua leh tui dik tak, nakkum January ni 1-a kum 18 tling turte tan Electoral Roll-a inthun dilna, anmahni bialtu BLO hnenah \heuh thehluh theih a ni. Electoral Roll-a inthun dil duhte leh siam \hat ngaite tan vawiin a\anga thla leh, October ni 13 thleng dilna hun hawn a ni a, hemi chhunga dilna leh sawiselna hmuhte chu kumin November ni 10 thlengin chin fel a ni ang. Electoral Roll hman theih tur chu kumin December ni 20 thleng buatsaih a ni ang a, Electoral Roll thar chu nakkum January ni 15-ah peih fel a ni ang.

Lungleiah pawh vawiin khan Bawrhsap, Pi Lalzarmawii, District Election Officer ni bawk chuan Draft Electoral Roll hi DC Conference Hall-ah a tlangzarh a, Political Party hruaitute, tlawmngai pawl hruaitute leh thuthar theh darhtute pawh an tel a ni.

Champhaiah pawh Bawrhsap, Pu Vanlalngaihsaka’n Draft Electoral Roll hi DC Conference Hall-ah vawiin khan a duh apiang hmuh theih turin a tlangzarh a, kum tling thar inthun dil duhte leh siam\hat tur neite tana form hman tur leh tih dan tur sawifiah a ni bawk.

Mamitah chuan Draft Electoral Roll hi DC Conference Hall-ah Additional DC, Pu H. Lianzela’n mipuite en theih turin a tar chhuak a, Election Officer, Pu M.H James-a’n Electoral Roll ennawn a \ulna chhan leh kum tling thar inthun duhte tana thil tih dan tur leh tihdik dil duhte tan thil tih dan tur a sawifiah a ni.

Serchhip-ah pawh Bawrhsap, Pi Sangchhin Chinzah-in Electoral Roll ding lai, vawiin a\anga Draft Roll chang ta chu mipuite en theih turin a tlangzarh bawk.