Sri Lanka boruak la ziaawm thei lo, curfew bawhchhia mipuiin police tâwng

0
329
views

Sri Lanka-a buaina chhuak chuan ziaawm lam a la pan thei lo a, vawiin lamah mipui pungkhawmin police-te an bei. Sri Lanka district laili, Kandy-a buaina chhuakah hian police pathum an hliam tih an thupuangtu chuan an sawi a, curfew bawhchhia leh buaina chawh chhuah tum mi 7 an man thu an sawi bawk a ni. Nimin lama buaina chhuakah pawh khan in kang pakhat-ah Muslim pakhat ruang chhar a ni a, hei vang hian vawiin lamah boruak a sosang hle a, Sri Lanka Parliament chuan nimin khan Muslim sakhaw zuitute hnenah hian ngaihdam a dil nghe nghe a, an ram Enterprise Development Minister, Lakshman Kiriella chuan Muslim te chunga tharum thawhna thleng chu pawi an tih thu a sawi a ni. Buaina punlun zel tur veng tur hian Sri Lanka sorkar chuan sipai leh police tam zawk Kandy-ah hian a tirh luh belh zel a, an kutah thuneihna tam zawk dahbelh a ni tih an sawi bawk.