Sri Lanka President, Maithripala Sirisena-a’n an ram PM Ranil Wickremesinghe a ban hnuah zirtawpni zan khan PM thar atan Mahindra Rajapakse chu rinawmthu tiam tira lakluh a ni a, Wickremesinghe hian vawiin khan an ram Parliament Speaker hnenah thlawptu a ngah zawk a ni tih finfiahna hun siam sak a phut thu a thlen.

0
482
views

 

Wickremesinghe hian ban a nih dan chu dan kalh a nih thu leh an ram Parliament-ah thlawptu a ngah zawk niin a sawi a, hei hi finfiah turin Speaker chu Emergency Session ko turin a phut a, ban a nih thu hi chhuah ni tawh mahse, PM chenna, Temple Tress-ah a la cheng reng a, PM a la nih reng thu a Sirisena hi a hriattir bawk a ni. Sri Lanka dinhmun hi European Union chuan ngun taka a thli thlai reng thu a sawi a, Colombo khawpuia France, Germany, Italy, Netherlands, Romania palaite leh UK High Commissioner-te chuan a khawi lam ve ve pawh a ram danpui bawhchhe lo tur leh tharum thawh zawnga che lo tur leh chanchinthar lakhawmtute nek chep lo tura an duh thu an sawi bawk a ni.